Kandidati për kreun e Federatës Shqiptare të Futbollit, Bashkim Fino, që doli i humbur në zgjedhjet e 7 shkurtit, është rikthyer të flasë pas re3fuzimit të regjistrimit të këtyre zgjedhjeve nga Gjykata e Tiranës. Fino ka rikujtuar edhe njëherë se çështja është duke u shqyrtuar edhe në Gjykatën e Arbitrazhit në Lozanë, CAS dhe ka hedhur sërish idenë se zgjedhjet duhen ribërë.
“Nuk është aspak e vërtetë që jam tërhequr nga CAS-i. Ne kemi bërë një padi për parregullsitë, që tashmë edhe Gjykata e Tiranës nuk e regjistroi vendimmarrjen e Asamblesë. Presin të gjitha procedurat që të mbarojë procesi, sepse ne kemi ngritur dy padi, një në KAS-in shqiptar, pavarësisht se FSHF nuk e njeh, dhe një në CAS-in e Lozanës. Natyrisht CAS-i i Lozanës do kohën e vet”.
Bashkim Fino ka komentuar edhe vendimin e gjykatës në lidhje me mosregjistrimin e zgjedhjeve të Federatës shqiptare të Futbollit, duke u shprehur se drejtuesit tashmë janë jo legjitimë. “Vendimi i Gjykatës së Tiranës ka qenë pozitiv, në sensin që vërtetoi të gjitha parregullsitë që ne prej muajsh para zgjedhjeve kemi thënë. Më vjen keq që është një deklarim i tillë, natyrisht që kjo është një gjë që do ta dëshironte zoti Duka si institucion dhe Komiteti Ekzekutiv i tij që tashmë janë të paligjshëm”–shton Fino.
Në pritje të vendimit të CAS, Fino është i bindur që do të ketë zgjedhje të reja. “Duhet të ribëhen zgjedhjet e FSHF-së, duhen bërë nga e para. Ndërkohë, jemi duke pritur qoftë vendimin e KAS-it shqiptar, qoftë edhe atë të CAS-it të Lozanës”–përfundoi Bashkim Fino.
