Nga Mero Baze/ Komisioni Qendror i Zgjedhjeve publikoi raportin financiar të Partisë Demokratike për vitin 2017 dhe shifrat nuk rakordojnë. Lulzim Basha është tani përballë dy problemeve në Tiranë.
E para përballja me ligjin për financimin e partive politike dhe rreziku që të penalizohet për fallsifikim të dhënash, që sipas Kodit Penal dënohet nga 3 deri 5 vjet burg. Dhe e dyta të provoj që pagesat në SHBA kanë burim të pastër paresh, pasi përndryshe duhet të përballet dhe me akuzën e pastrimit të pareve.
Në rastin e parë ai përballet me nenin 190 ku në paragrafin e fundit thuhet se kur fallsifikimi bëhet nga personi që ka pë detyrë të lëshoj dokumentat dënohet nga 3 deri 5 vjet burg.
Në rastin e dytë do të pëballet me nenin 287 për pastrimin e produktve të veprës penale ose veprimtarive kriminale që dënohet nga 7 deri në 14 vjet.
Tani ka kaluar çdo afat kohor që Lulzim Basha të përmirësoj apo plotësoj të dhënat që ka deklaruar në KQZ, ndërkohë që për paret e paguara në SHBA tek lobisti Muzin përmes një kompanie offshore me pronar rus, tani ka së paku 5 deklarata të ndryshme. Por kjo është çështje se si ai do të përballet në SHBA me këtë histori. Ndoshta ish guvernatori Guliani, që e njef dhe mikun e tij Alptekin mund t’i jap këshilla për avokat të mirë.
Tek ne historia ka të bëj me dy ligje, atë të fallsifikimit të të dhënave dhe një mundësi tjetër për tu përballur me akuzën e pastrimit të pareve, nëse ai nuk provon se paret e paguara në SHBA dhe të padeklaruara këtu, kanë origjinë të pastër.
E gjithë kjo histori po merret më lehtë se sa mendohet prej Partisë Demokratike. Të bindur se këtu liderët politikë mbrohen politikisht dhe jo me ligj, të gjithë e trajtojnë këtë çështje si problem i një njeriu që e ka për detyrë të bëj çfarë të dojë me paret e partisë së tij.
Në fakt përtej përballjes me ligjin shqiptar, kjo është dhe një çështje e mprehtë e korrupsionit brenda Partisë Demokratike, ku askush nuk është pyetur për asgjë dhe nuk ka asnjë vendimarrje institucionale për këtë anarshi financiare
Kritikët e Lulzim Bashës i kanë kushtuar pak rëndësi këtij debati ndërkohë që e kritikojnë Lulzim Bashën dhe për problem në ndonjë seksion të PD. Në mënyrë të pakutpueshme ata kanë shmangur goditjen ndaj tij, ndaj një çështje e cila është thelbësore për mënyrën se si drejtohet një parti. Dhe meqë ata e kanë betejën brenda partisë, kjo çështje është kryeskandali i asaj partie për 27 vjet, pasi asnjëherë nuk ka pas akuza brenda partisë për abuzime të tilla financiare.
Shkelja me të dy këmbët e ligjit shqiptar por dhe statutit të PD për mënyrën se si “qeveriset” vet PD, është një çështje thelbësore për figurën e kryetarit të partisë dhe kritikët e tij nuk duhet të kompleksohen.
Sot një nga presidentët më popullor të Francës përfundoi në qeli, pikërisht për disiplinën financiare të partisë së tij, që ishte financuar nga lekët e Gadafit.
As Sarkozia nuk i mori për vete paret nga Gadafi, (për Bashën as për këtë se vë dot dorën në zjarr) por arroganca me të cilën ai vendosi të financohej nga një tip i tillë dhe rruga se si kanë mbërritur paret atje e bëjnë atë një person të ndjekur nga drejtësia franceze.
Ndaj çështja e Bashës duhet marr seriozisht jo vetëm si një person që ka problem me ligjin shqiptar, por mbi të gjitha dhe si një person që duhet të ketë problem me partinë e tij, me mënyrën jo transparente dhe harbute të përdorimit të pareve të zeza dhe përfundimin banal të tij në grackat e mafias ruse që merret me influencën politike në Uashington.
Ideja se drejtësia jonë nuk do të veprojë në këtë rast, pasi është çështje politike, nuk është një gjykim i pjekur politik. Ata që shpresojnë që drejtësia do bëj pazar për Lulzim Bashën, janë duke gabuar dyfish, pasi PD ose do ketë një lider të pastër dhe të pakapur nga askush, që mund ta sjell në pushtet, ose do ketë në krye dikë, që sa herë të bezdis qeverinë, ti kujtojnë prangat. Është më mirë që PD të shpëtoj nga Basha, në qoftë se ai nuk është njeri i lirë, se sa Basha të shpëtoj tërë jetën nga burgu prej PD. Duke e lënë atë në opozitë./Tema/
