Gjykata e Krimeve të Rënda ka dyshime të forta se disa prona me vlerë 10 milionë euro janë përfituar nga veprimtari të paligjshme si trafiku i lëndëve narkotike, veçanërisht ai i kokainës. Për këtë arsye ajo ka urdhëruar sekuestrimin e pronave në kryeqytet. Vendimi erdhi pas kërkesës së Prokurorisë së Krimeve të Rënda.
Në televizionin Report Tv u deklarua se pronat për të cilat Krimet e Rënda kanë urdhëruar sekuestron janë regjistruar në emër të Luan Spahiut, 53-vjeç, me banim në Tiranë. 53-vjeçari rezulton i dënuar në Gjermani me 5 vite burg për trafik droge. Sipas burimeve të policisë, Spahiu është dënuar për trafikimin e sasive të mëdha të kokainës nga Kolumbia drejt Gjermanisë dhe vendeve të tjera.
Dyshohet se paratë e fituara nga kjo linjë e trafikut të kokainës, Spahiu i kishte investuar në kompaninë e ndërtimit “Pinari” Sh.p.k në Tiranë, si dhe në disa troje ndërtimi dhe sipërfaqe toke në Selitë e në rrugën “Naim Frashëri”.
Burime nga Prokuroria e Krimeve të Rënda thanë se po punohet për identifikimin e pasurive të tjera në emër të biznesmenit Luan Spahiu, ndërkohë që pas hetimit të Prokurorisë, Gjykata vendosi që 32 apartamente me sipërfaqe 3400 m2 të ndërtuara nga Pinari sekuestrohen. Gjithashtu, Krimet e Rënda kanë urdhëruar sekuestro edhe mbi tri njësi tregtare në të njëjtin kompleks, me sipërfaqe 230 m2, një vilë tri katëshe në rrugën “Hoxha Tahsim”, me sipërfaqe 340 m2, si dhe disa garazhde u sekuestruan, dy sipërfaqe trojesh në rrugën “Naim Frashëri” dhe në Selitë, përkatësisht 5600 metra dhe 18 mijë m2, si dhe tre automjete të shtrenjta.