Kreu i Partisë Demokratike, Lulzim Basha është treguar kritik me qeverinë Berisha, teksa pranoi se dy privatizime të saj ishin të dështuara.
Konkretisht, sipas tij privatizimi i ARMO-s dhe CEZ-it ishin të dështuara, gjë që e deklaroi teksa mori pjesë në konferencën (De)Rregullimi i Tregjeve, organizuar nga Forumi i Tiranës për Lirinë Ekonomike-Instituti Pashko.
Kreu i PD-së theksoi se pavarësisht se ato privatizimet u nisën me qëllim për të mirën publike, rezultuan të dështuara:
“Është e vërtetë, privatizimi i ARMO-s dhe privatizimi i CEZ-it nuk dhanë rezultatet e dëshiruara. Por, nga ana tjetër, nuk ka asnjë krahasim me qëllimin për të arritur një rezultat me të mirë publike, që ishte në gjenezë privatizimi i ARMO-s dhe CEZ, të dyja të dështuara, absolutisht dhe qëllimit për të kapur çdo sektor të ekonomisë me duart e politikës dhe të një grushti njerëzish të lidhur me politikën”, tha Basha.
Po ashtu, Basha tha se 5 vitet e fundit kanë qenë 5 vite të humbura për Shqipërinë dhe se ka ardhur koha që nëpërmjet alternativës së Partisë Demokratike për çlirimin e tregjeve nga monopolet, shqiptarëve t’u kthehet vetëbesimi se Shqipëria mund të bëhet një vend i zhvilluar.
“Shqipëria ka shënuar një rekord të paprecedentë për çdo vend postkomunist duke mos pasur asnjë investim të ri të huaj në këto 5 vite. Ku jemi me Shqipërinë? Çfarë investimi të huaj kemi thithur në mars, janar–mars 2016, 2017, 2015, 2014? Kaluan 5 vite dhe nuk ka një investim të huaj. Përkundrazi, ka ikur Sheratoni, ka ikur Glaxo Smith Kline, iku Onmix që do të ndërtonte resortin 400 milionë euro. Alternativa e PD-së për ringritjen e ekonomisë është çlirimi i tregjeve dhe ndalimi me ligj i monopoleve. Kjo është rruga e vetme për të kthyer vetëbesimin se shqiptarët janë në gjendje për të bërë vepra të mëdha”, deklaroi Basha.
