Lulzim Basha ka akuzuar Ramën dhe Veliajn se janë përgjegjës për heqjen e 100 licencave për biznesin riciklues. Në një deklaratë për mediet, Basha tha se Shqipëria eksporton drogë dhe importon plehra, skemë kjo e Ramës dhe Ahmetajt.
Lidhur me kokainën e kapur në Maminas, Basha tha se kanë lidhje bosët e Xibrakës.
Deklarata e Bashës:
Shoqata e ricikluesve të Shqipërisë ka denoncuar mbylljen e afro 100 bizneseve, heqjen e licencave nga Edi Rama në një revansh përmes taksidarëve dhe inspektorëve të qeverisë. Dua t’ju them shqiptarëve se heqja e licencave përkon me futjen nën kontrollin total nga të procesit të mbledhjes, riciklimit, djegies dhe groposjes së mbeturinave në Bashkinë e Tiranës. Para dy muajsh, ai që ka në pronësi inceneratorët dhe që përfaqëson Ahmetajn, ka blerë kuotën kontrolluese të kompanisë së pastrimit të Bashkisë së Tiranës. Skema është përqendrimi i gjithë aktivitetit, mbledhja djegia dhe groposja është në duart e dyshes Rama-Ahmetaj. Për këtë arsye kanë mbyllur pothuajse gjysmën e kompanive në sektorin e riciklimit.
E ka futur në dorë riciklimin dhe djegien e plehrave, ka ndërtuar dhe po ndërton inceneratorë dhe të gjitha janë në dorë të Arben Ahmetajt dhe Ramës. U janë hequr licensat 150 kompanive. Po ndodh e njëjta gjë që ndodhi me lojërat e fatit. U mbyllën? Jo, u bë një koncesion që e dimë se e ka Olsi Rama. Po me drogën? U sulmua Lazarati, droga u kultivua në të gjithë Shqipërinë nën kontrollin e Saimir Tahirit. E njëjta gjë po ndodh edhe me blerjet e bankave. E njëjta gjë po ndodh me ndërtimin. Krimi po kap ekonominë, siç ka kapur politikën. Vendi as nuk eksporton më, as nuk prodhon më. Nuk ka as investime të huaja dhe as të brendshme, nuk ka vend për rritje ekonomike. Shumicës së shqiptarëve u hiqet edhe ndihma ekonomike. Zgjidhja e këtij problemi kërkon një transformim të thellë politik e ekonomik. Kërkon çlirimin e ekonomisë nga kthetrat e drogës.
E konsiderojmë aferën e inceneratorëve anën tjetër të medaljes së drogës së Shqipërisë, që duhet të çmontohet deri në fund për të hapur rrugë për një Shqipëri evropiane. Në krye të vendit është një njeri që futi drogën në sistem.
