Gjashtë vendet e Ballkanit Perëndimor kërkojnë t’i bashkohen familjes evropiane. Por, për Brukselin shumë pak është bërë deri më tani për procesin e anëtarësimit. Serbia, Mali i Zi janë më të avantazhuara kundrejt vendeve të tjera midis të cilave edhe Shqipëria, e cila pret hapjen e negociatave mes reformave gjysmake që ka ndërmarrë vitet e fundit, shkruan Tirana Today.
Presidenti i Komisionit Evropian Jean-Claude Juncker vizitoi të gjashtë vendet javën që lamë pas. Ai e mbylli vizitën në Sofje të Bullgarisë, vend i cili po mban presidencën e radhës së Bashkimit Evropian.
Në një intervistë për Euronews, ai ka komentuar dhe marrëdhëniet e ngushta mes Serbisë dhe Rusisë, si dhe ndikimin rus në vendet e Ballkanit Perëndimor.
Le të fillojmë me ato vende që konsiderohen kandidatët më premtues për anëtarësim: Serbia dhe Mali i Zi. Sa realiste është kjo, duke marrë parasysh çështjet ekzistuese?
Jean-Claude Juncker, Presidenti i Komisionit Evropian: Ne nuk flasim për të dhënat e anëtarësimit apo rezultatet, ne flasim për procesin. Dhe unë jam përpjekur t’i bind qeveritë në këtë rajon që të përmbushin të gjitha kushtet dhe kriteret për aderim. Viti 2025 që po synojmë është një udhëzues, jo një premtim. Nuk duhet të harrojmë se në Evropën Perëndimore ekziston një lloj lodhje e zgjerimit. Sidomos kur është fjala për Serbinë dhe Malin e Zi. Por të dyja po bëjnë përparim, ne duhet t’i ndihmojmë ata.
Megjithatë, nuk duhet të harrojmë se Serbia ka lidhje të ngushta me Moskën, Rusia është shumë aktive në rajon. Ministri i Jashtëm Lavrov e viziton atë rregullisht. Kohët e fundit ai tha se nëse ju kërkoni Serbisë për një vendim, atëherë përsërisni gabimin e bërë në Ukrainë. Çfarë thoni për këtë? A është ky një vendim?
Jean-Claude Juncker, Presidenti i Komisionit Evropian: Së pari, nuk ekziston një krahasim i mundshëm ndërmjet Serbisë dhe Ukrainës. Së dyti, ua shpjegova kolegëve se një konstrukt evropian nuk do të thotë një bastion kundër shteteve të tjera. Për ne është një proces integrimi. I kam kërkuar një vendim Serbisë, sepse ajo ka marrëdhënie normale me Rusinë, në të njëjtën kohë ajo ka marrëdhënie të mira me Bashkimin Evropian.
Por a keni nevojë të përshtatni politikën tuaj të jashtme me atë të BE-së, për shembull, kur bëhet fjalë për sanksione kundër Rusisë?
Jean-Claude Juncker, Presidenti i Komisionit Evropian: Të gjithë partnerët në rajon janë përshtatur me linjën e BE-së, por Serbia ka një status tjetër, nuk merr pjesë në sanksione. Nëse ai i afrohet Bashkimit Evropian, atëherë duhet të përshtatet, por kjo nuk është çështje afatshkurtër. TIRANA TODAY
