Kreu i Policisë së Shtetit, Ardi Veliu ka dalë në një konferencë për shtyp, ku ka folur lidhur me mega operacionin e zhvilluar mbrëmë, ku u kapën 613 kg kokainë.
Veliu tha se droga ka mbërritur në portin e Durrësit më 19 shkurt, e fshehur në kontejnerët me banane, ndërsa më pas është mbajtur nën vëzhgim për gjatë gjithë kohës, derisa operacioni “Last Snow” është kryer gjatë natës së djeshme në magazinën e kompanisë “Arbri Garden”, me pronar A.Ç-në.
Ky i fundit është shpallur në kërkim, ndërsa janë arrestuar shtetasit Donaldo Lushaj, 25 vjeç nga Tropoja dhe Armando Pezaku, nga Durrësi.
Fjala e Veliut:
“Policia e Shtetit në bashkëpunim me Krimet e Rënda, në bazën e informacioneve të siguruara më herët, pas një pune të mirëogranizuar, ka arritur të finalizojë operacioni Last Snoë. U bë e mundur kapja e një sasia drogë rekord, me vlerë mbi 180 milion euro. Ishte nisur me kontejnerë nga Kolumbia, duke kaluar tranzit ne Itali, Maltë, e mbërritur në Shqipëri më 19 shkurt.
Operacioni ka nisur më 27 shkurt, në momentin që ngarkesa u mor në dorëzim nga kompania “Arbri me pronar shtetasin A.Ç.
Kokiana ishte e fshehur në kontejnerin me banane, që u mbajt në vëzhgim të pandërprerë, derisa mbërriti në magazinën e firmës. Shërbimet kanë rrethuar objektin e më pas kanë ndërhyrë në magazinë. Nga hetimet rezultojnë të përfshirë Dondaldo Lushaj, 25 vjeç, lindur në Tropojë dhe shtetasi Armando Pezaku, lindur në Durrës. U shpall në kërkim pronari A.Ç. Hetimet po vijojnë për të zbuluar
Vijon puna për sekuestrimin e pasurive.
Policia e Shtetit e vendosur të godasë çdo paligjshmëri për të ndërtuar një Shqipëri më të qetë e të sigurt.”, tha Veliu.
Edhe prokurori Hajdarmataj ka folur lidhur me operacionin, ku tha se hetimet vazhdojnë dhe se s’mund të japë detaje:
“Nuk mund t’ju japim detaje të tjera, hetimet vazhdojnë. Çështja është nën hetim. Ky është rasti i vetëm me këtë sasi të lëndëve narkotike, ne s’mund të japim detaje të tjera, në vijim do mësoni detaje nga operacioni. Jemi të gjithë të angazhuar.”
NJOFTIMI I POLICISË SË SHTETIT:
Kapet sasi rekord kokaine në Portin e Durrësit, me vlerë tregu rreth 180 milion euro.
Drejtori i Përgjithshëm i Policisë së Shtetit Ardi Veliu në konferencë për shtyp së bashku me përfaqësues të Prokurorisë së Krimeve të Rënda, Hetimit Doganor dhe përfaqësues të Policisë së Shtetit.
Policia e Shtetit në bashkëpunim me Prokurorinë e Krimeve të Rënda dhe Drejtorinë e Hetimit Doganor, mbi bazën e informacioneve të siguruara më herët dhe analizës së riskut, pas një pune të mirë organizuar dhe të koordinuar, ka arritur të finalizojë me sukses operacionin e koduar “Last Snow”.
Si rezultat i këtij operacioni u bë i mundur kapja dhe sekuestrimi i një sasie rekord prej 613 kilogramë e 350 gramë lënde narkotike e dyshuar kokainë, me vlerë tregu mbi 180 milion euro.
Hetimet kanë dokumentuar se lënda narkotike ishte nisur me kontenier nga Kolumbia duke kaluar tranzit përmes Italisë, në Maltë e më pas me anije ka mbërritur në Portin e Durrësit në Shqipëri, në datën 19 shkurt 2018.
Kokaina ishte e fshehur në kontenier me dysheme të dyfishtë, të ngarkuar me banane.
Operacioni ka nisur gjatë mbrëmjes së datës 27 shkurt 2018, në Portin Detar të Durrësit, në momentin që ngarkesa e ligjshme me banane, u mor në dorëzim nga firma porositëse “Arbri Garden” shpk, me pronar shtetasin A.Ç.
Sasia e lëndës narkotike ishte e paketuar në 528 pako, të mbështjella me letër natriban me kode të vendosura nga trafikantët.
Kontenieri i mbërritur në Portin e Durrësit, u mbajt nën vëzhgim të pandërprerë deri sa mbërriti në magazinat e firmës, nga strukturat e Policisë së Shtetit.
Shërbimet e Policisë kanë rrethuar në perimetrin e jashtëm objektin e më pas kanë ndërhyrë në brendësi të magazinës. Pas kontrollit të imtësishëm të kontenierit, kanë bërë të mundur gjetjen dhe sekuestrimin e lëndës narkotike.
Nga tërësia e veprimeve të kryera, rezultuan të përfshirë në këtë aktivitet kriminal shtetasit dhe u arrestuan në flagrancë:
– Donaldo Lushaj, 25 vjeç, lindur në Tropojë dhe banues në Tiranë;
– Armando Pezaku, 25 vjeç, lindur dhe banues në Durrës.
Gjithashtu u shpall në kërkim shtetasi A.Ç., pronari i firmës ku u sekuestrua lënda narkotike.
Autoritetet shqiptare po vijojnë hetimet ngushtësisht me partnerët e huaj për të zbuluar gjithë lidhjet dhe personat e përfshirë në këtë aktivitet kriminal.
Ndërkohë po vijon puna për evidentimin e pasurive të të arrestuarve dhe të përfshirëve në këtë trafik narkotikësh.
Policia e Shtetit është e vendosur të godasë me Forcën e Ligjit çdo paligjshmëri dhe aktivitet kriminal, për të ndërtuar një Shqipëri më të qetë e të sigurtë.
