Është shtyrë sërish seanca e jashtëzakonshme për ratifikimi e marrëveshjes së Demarkacionit mes Kosovës dhe Malit të Zi.
Seanca nisi sot në Kuvendin e Kosovës rreth orës 10:300, ndërsa në parlament ka pasur debate të shumta, teksa nuk është arritur në konsensus mes palëve politike për votimin pro marrëveshjes.
Kryeministri i Kosovës, Ramush Haradinaj ka folur disa herë në foltoren e Kuvendit, teksa ka thënë:
“Ligji i mirë apo i keq, ne jemi në gjendje ta votojmë sot. Kush e vonon, ju lutem merrni përgjegjësinë”, ndërsa më herët ai akuzoi deputetët kundër marrëveshjes, teksa iu drejtua me fjalët: “A jeni në terezi, si nuk po mendoni për tokën që jua lanë të parët tuaj? Turp t’ju vijë”.
Në mbyllje të seancës, kreu i Kuvendit Kadri Veseli propozoi shtyrjen për të hënën, por nuk u ra dakord, pasi kryeministri nuk do të mund të ishte i pranishëm për shkak të agjendës së tij.
Prandaj, Veseli propozoi që seanca të vijonte të mërkurën në orën 10:00, duke e kaluar propozimin në votim, i cili u miratua me 60 vota pro, 30 kundër dhe 1 abstenim. TIRANA TODAY
