Deklaratat e forta të presidentit, bërë në konferencën për shtyp, bënë bujë të madhe, ndërsa pati edhe nga ata që e quajtën atë “burrë shteti”, i cili po mbron Kushtetutën e vendit nga çdo pazar jo i ndershëm me Greqinë.
Por, koloneli Myslim Pashaj nuk e sheh kështu daljen e djeshme të Metës. Sipas tij, presidenti “e ka hallin tjetërkund”.
Në një opinion të publikuar sot me titullin “Ku ishe ti zoti Meta?”, koloneli kujton vitet 2009-2010, kur Meta mori detyrën e zv/kryeministrit dhe Ministrit të Jashtëm, por në atë kohë, shkruan Pashaj, Meta ishte i politikës dhe jo i integritetit territorial.
“Ishte koha kur bëhej shqyrtim ne Gjykatën Kushtetuese.
Ai (Meta) dëgjonte se si Hulumtues të pavarur dhe figura të njohura shkencore e të publicistikës bënin thirrje në ndihmë të së Drejtës Detare të Shqipërisë, që institucionet shqiptare të shpreheshin me argumente shkencore por ato, turpërisht, heshtën.
Se mungonte Shteti në funksionimin e tij normal”, shkruan ndër të tjera Pashaj, ndërsa vijon:
“Duket sikur kërcënoni, aq shumë i jeni futur Vendimit të Gjykatës Kushtetuese të cilën dikur nuk e kishit përfillur, sa Ministria e Evropës…s’gjen vrimë se ku të futet…e detyroni dhe për gjëra teknike, që janë të domosdoshme ta bëjnë institucionet.
Ç’është ky turfullim i panevojshëm brenda vedit që bje në sy edhe të fqinjëve tanë!”
