Ish-trajneri i Partizanit, Mark Iuliano, është rikthyer të flasë për eksperiencën që pati në Shqipëri. Në një intervistë për “Casa Baggio”, ai ka ngritur akuza të rënda mbi kampionatin shqiptar, ku e cilëson si të mbytur nga bastet.
Kur u pyet se pse eksperienca te Partizani me Moxhin u mbyll para kohe ai dha një përgjigje nga e cila kuptohet se eksperienca këtu nuk i ka pëlqyer shumë.
“Që në fillim kisha dyshimet e mia nëse duhet ta pranoja apo jo këtë ofertë, dhe gjatë punës aty kuptova që parandjenjat e mia ishin të sakta. Sepse, për fat të keq, lejohet që futbollistë, drejtues dhe presidentët vendosin baste për ndeshjet. Kjo gjë më bëri të kisha shumë vështirësi, sepse ishte një ambient i kushtëzuar dhe ku nuk mund të punoja seriozisht. Sipas meje ka patur ndeshje të dyshimta”, deklaroi italiani.
Trajneri foli edhe për të ardhmen e tij dhe ofertat në drejtim të tij. “Së fundmi, kam marrë disa oferta nga Seria B dhe C. Dua të përgatitem që të kthehem në nivelin më të lartë”.
