Ish-anëtar i Gjykatës Kushtetueses, Besnik Imeraj, nuk do t’i nënshtrohet procesit të vettingut. Imeraj dy javë më parë ka dhënë dorëheqjen, ndërsa i kërkoi Komisionit të Pavarur të Kualifikimit të ndërpriste procesin e rivlerësimit ndaj figurës së tij për kohën që ka shërbyer si anëtar i kësaj gjykate.
Bazuar në vendimin e sotëm, KPK ka vendosur ndërprerjen e procedurave të rivlerësimit për subjektin e rivlerësimit Besnik Imeraj.Reforma në drejtësi dhe procesi i vlerësimit të figurës së gjyqtarëve dhe prokurorëve është shoqëruar edhe me largimin e ish-kryeprokurorit të përgjithshëm, Adriatik Lalla, ndërsa ai kërkoi dhe ndërprerjen e vettingut ndaj tij.
Kujtojmë se gjatë ditës së sotme ishte ambasadori amerikan, Donald Lu, i cili deklaroi se largimi nga vettingu nuk do të thotë shpëtim nga shkeljet dhe përgjegjësitë penale, duke ripërsëritur se gjyqtarët dhe prokurorët e korruptuar kanë filluar të dridhen nga reforma. Ai shtoi se kjo është një fitore e madhe dhe një forcë, që do të pastrojë njëherë e mirë sistemin e drejtësisë nga korrupsioni.
Njoftimi i KPK
Komisioni i Pavarur i Kualifikimit njofton se trupa gjykuese, e përbërë nga Brunilda Bekteshi (kryesuese), Etleda Çiftja (anëtare) dhe Genta Tafa (Bungo) (relatore), pasi mori dijeni për vendimin nr. 2, datë 31.01.2018 të Gjykatës Kushtetuese, botuar në Fletoren Zyrtare nr. 14, datë 06.02.2018, në zbatim të nenit G të Aneksit të Kushtetutës, ka vendosur ndërprerjen e procedurave të rivlerësimit për subjektin e rivlerësimit Besnik Imeraj.
Vendimi do të publikohet në faqen zyrtare të internetit të këtij institucioni në respektim të afatit të përcaktuar në nenin 55/7 të ligjit nr.84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.
