Teuta është zhytur në zonën e rënies në tabelën e klasifikimit në kampionat dhe kjo ka bërë që të lëvizin gjërat tek ekipi. Trajneri Stavri Nica i cili arriti të zhvillonte vetëm katër ndeshje me “Djemtë e Detit”, ka dhënë dorëheqjen.
Trajneri 63-vjeçar nuk ka gjetur marrëveshjen me drejtuesit e klubit për vazhdimin e bashkëpunimit dhe ka vendosur të japë dorëheqjen e cila edhe pse u refuzua fillimisht është pranuar më pas nga presidenti Edmond Hasanbelliu.
Pak kohë më parë ishte Gugash Magani ai që nuk arriti të nxirrte më të mirën nga ekipi dhe pasi kërkoi disa herë dorëheqjen dhe iu refuzua, më në fund u largua. Por të njëjtin fat si duket pati edhe pasardhësi i ti, i cili nuk i rezistoi gjatë stolit dhe e la Teutën sërish në fundin e tabelës.
Nica nuk ka pranuar të vazhdojë aventurën e tij në krye të “Djemve të Detit” pasi ka mbetur i pakënaqur nga cilësitë e grupit të futbollistët që kishte në dispozicion. Ish trajneri i Laçit e drejtoi Teutën në 4 takime mes Kupës dhe kampionatit duke regjistruar 2 barazime dhe 2 humbje. Disfata me Luftëtarit i dha fund aventurës së tij në krye të Teutës, me skuadrën durrsake që tashmë me shumë gjasa do të drejtohet nga një njohje e vjetër si Gentian Begeja deri në fund të sezonit.
