Në “Zeqir Ymeri”, u luajt sot përballja e javës së 19 mes kampionëve të Shqipërisë dhe surprizës së kampionatit, Kamzës. Ishin miqtë që surprizuan dhe fituan ndeshjen me një gol të realizuar në minutën e 70’ Rezin, gol që ishte deciziv për fatin e takimit. Ndeshja filloi mirë për vendasit të cilët ishin superiorë dhe po kërcënonin vazhdimisht portën e Kamzës, por pa sukses. Guri ka mbajtur në tension prapavijën e Kamzës tërë lojës, si maja e sulmit për të tijtë, ndërsa Kale mbante në presion krahun e majtë.
Kamza befason dhe trondit kampionët brenda në shtëpi, ku Rezi përfiton nga një hezitim i Koliçit për ta bllokuar dhe dërgon topin në rrjetë. Trajneri Pacult lëviz nga stoli, bën zëvendësime, e sposton skuadrën e tij në gjysmëfushën mike, por mungon finalizimi i aksioneve. Goli i Rezit mbetet në fuqi deri në fund, duke i dërguar tri pikët e këtij ballafaqimi në llogarinë e të tijve. Tjetër hap fals i Kukësit, që tashmë stadiumi i vet po i kthehet në makth. Aty nuk po fiton dot, ndaj edhe kreu sa vjen e largohet, bëhet mision i pamundur mbrojtja e kurorës.
Lushnja 0-2 Vllaznia
Ndaj Lushnjës nuk i lejohej gabimi dhe Vllaznia arriti të marrë maksimumin e pikëve, falë një fitoreje 0-2. Vendimtar ishte sulmuesi shkodran i ardhur në janar nga Partizani, Xhevahir Sukaj që dërgoi 2 herë topin në rrjetën e Spahos, në 45-minutëshin e dytë. Pjesa e parë në ‘Roza Haxhiu’ ishte shumë e vakët, me të dy skuadrat që synonin më shumë të mos gabonin dhe sulmonin me kujdes. 45-minutëshi i dytë nisi me një tjetër ritëm, ku Lushnja shkoi shumë pranë golit, që në minutën e 46, por Sherri priti bukur goditjen me kokë të Gavës.
Rezultati u zhbllokua në minutën e 64-t, nga ana e Sukajt, që pas asistit të Gilman Likës, u lirua mirë në zonë dhe goditi me të majtën, duke e dërguar topin në rrjetë. 11 minuta më pas, ishte sërish Sukaj që tentoi të godasë portën, por topi u ndal me dorë nga mbrojtësi i verdhejeshilëve, Prenci, duke bërë që gjyqtari Xhaja të akordojë penallti. Ekzekutimin e 11-metërshit e mori përsipër sërish Sukaj, që nuk gaboi përballë Spahos, duke shënuar golin e qetësisë për skuadrën e Gjokës, që momentalisht shkon në vendin e 8, jashtë zonës së ftohtë.
