Një ngjarje e rëndë ka ndodhur në Pediatrinë e QSUT-së, ku ka ndërruar jetë një foshnje 7-muajshe. Shkak i vdekjes janë komplikacionet që foshnja ka pasur nga fruthi. Lajmi u konfirmua edhe nga mjekët e Pediatrisë, të cilët shtojnë se janë 55 fëmijë të prekur nga fruthi deri më tani.
Mësohet se ngjarja e rëndë ka ndodhur në të gdhirë të ditës së hënë, pas përpjekjeve të vazhdueshme të mjekëve për ta mbajtur në jetë. Foshnja ka qenë prej ditësh në reanimacionin e QSUT-së, ndërsa është tentuar të intubohet, por ka qenë e pamundur për shkak të komplikacioneve. Fëmija është mbajtur në terapi intensive për ditë të tëra, por nuk ka mundur të shpëtojë, raporton BalkanWeb.
Mësohet se foshnja ishte e pavaksinuar, pasi vaksina e fruthit, MMR merret mbi moshën 1-vjeçare. Ky është rasti i parë fatal pas shfaqjes së fruthit në vend, ku ka kapur një numër të madh fëmijësh dhe disa të rritur.
