Presidenti i Shqipërisë, Ilir Meta u është përgjigjur deklaratave të homologut të tij grek, Pavlopulos bërë disa ditë më parë, kur i kërkoi Tiranës zyrtare të mos e përmendë më çështjen Çame.
Në një intervistë për “Albanian Daily News”, Meta tha se presidenti grek nuk është në sintoni me Bushatin e Kotzias, ndërsa bëri thirrje për ruajtjen e qetësisë.
“Dua të theksoj se këto deklarata nuk janë në sintoni me mesazhet e fundit publike dhe angazhimet e Ministrave të Jashtëm, Bushati dhe Kotzias.
Spektri i bashkëpunimit mes dy vendeve është universal që ka një rëndësi të jashtëzakonshme jo vetëm për vendet tona, por, mbi të gjitha, për popullin dhe qytetarët tanë.
Natyrisht, mund të ketë edhe çështje të caktuara mbi të cilat mund të ndajmë qëndrime të ndryshme, por kjo nuk do të thotë të humbasim qetësinë në komunikimin me njëri-tjetrin dhe të prekë bashkëpunimin e plotë dhe jetësor për të dy vendet tona dhe për njerëzit për këtë arsye.
Partneriteti nuk është thjesht një koncept dhe një dokument, por, në radhë të parë, është një mënyrë komunikimi e bazuar edhe në respektin reciprok”, tha Meta.
Pak ditë më parë Pavlopoulos u shpreh: “Është e papranueshme që udhëheqja e Shqipërisë në këto momente të ngrejë çështjen çame. Përveç faktit se kjo çështje nuk ekziston, është më mirë që Shqipëria të mos kujtojë se çfarë do të thotë historia e të ashtuquajturave çamë gjatë periudhës së mizorive naziste në Greqi, nëse dëshiron të ketë ndonjë perspektivë europiane”.
