Zbulohet videoja në të cilën duket Mario Meshini teksa largohet me motorin e tij vetëm pak minuta pas vrasjes së Devi Kasmit në Tiranë.
Tirana Today ka siguruar pamjet nga kamerat e sigurisë së një biznesi disa metra larg vendit ku mbeti i vrarë 42-vjeçari, tregojnë Mario Meshinin duke ecur me motor dhe pa skafandër në kokë.
Personi i parë i arrestuar nga policia e Tiranës si bashkë punëtor për vrasjen e Devi Kasmit ishte Mario Meshini. Ditën e djeshme gjykata vendosi për Mario Meshinin masën e sigurisë arrest me burg.
Meshini i kishte dërguar një mesazh Kasmit që të takohej me të, por në momentin që Kasmi ka dalë nga banesë, ka ndodhur ekzekutimi i tij, ndërsa Meshini ka parë gjithçka. Pas ngjarjes ai kishte ikur në shtëpi i tronditur, ndërsa më pas është shoqëruar në polici, ku ka dëshmuar gjithçka ka parë.
Mario Meshini dhe avokati i tij mbrojtës mohuan akuzat, duke dëshmuar se ai ishte shok me Kasmin dhe i bashkonte pasioni për palestrën. Në dëshminë e tij në polici një ditë më parë, Meshini tha se ekzekutori i Kasmit ishte me mjekër dhe trupgjatë.
Dyshimet u ngritën për Meshinin pas mesazhit që ai i kishte dërguar Kasmit, ku i kërkonte që të takoheshin, ndërsa pak më vonë ai u qëllua me armë zjarri për vdekje.
