Me tone të ashpra Athina zyrtare i është përgjigjur deklaratave të këshilltarit të presidentit të Turqisë, Rexhep Tayip Erdogan, i cili kërcënoi kryeministrin grek Aleksis Tsipras dhe Ministrin e Mbrojtjes Panos Kamenos.
Përmes zëdhënësit të vet, Aleksandros Yennimatas, ministria e Jashtme greke ka reaguar pas incidentit të ndodhur ne ujërat pranë ishullit Imia, ku ministri i Mbrojtjes, Kammenos, ishte pjesë e ceremonisë për hedhjen e një kurore me lule në kujtim të tre oficerëve grekë që humbën jetën gjatë incidentit më të nxehtë midis dy fqinjëve në Egje, 22 vjet më parë, u bllokua nga Turqia, duke ndezur një konflikt.
Athina zyrtare i ka cilësuar deklaratat e tij, të padenja. “Deklarata te tilla te neveritshme që vijnë nga këshilltari i Presidentit turk janë të huaja për kulturën politike evropiane. Duke pasur parasysh pozicionin që mban ky zyrtar, ai do të bënte mirë të kuptonte se deklaratat si këto nuk kontribuojnë në përmirësimin e marrëdhënieve midis dy vendeve”- thuhet në reagimin e Athinës zyrtare.
Po ashtu, Ministria e Jashtme greke ka theksuar se statusi ligjor i Egjeut është i qartë dhe i garantuar me ligj ndërkombëtar.
Kujtojmë se këshilltari i Erdoganit, Jigit Bulut, gjatë një programi televiziv tha:
“Athina do të ndiejë zemërimin e Turqisë, më keq se në Afrin. Ne do të thyejmë këmbët dhe duart e zyrtarëve, kryeministrit apo çdo ministri që do guxojë të shkelë në Imia, në Egje”,- tha këshilltari i Erdogan.
