Rusia rrezikon të bëhet “gaz i botës” gjatë Botërorit

Na ndajnë edhe pak muaj nga starti i Botërorit që do të organizohet në Rusi këtë verë dhe një lajm po bën xhiron e botës. Lajmi ka dalë nga një ekspert i ministrisë së agrikulturës, ku karkalecat rrezikojnë të turpërojnë Rusinë para gjithë botës.

Karkalecat zakonisht ushqehen me të korrat në Rusinë jugore dhe Pyotr Chekmaryov, i cili kujdeset për mbrojtjen e bimëve në ministrinë e agrikulturës, thotë se ata mund të sulmojnë edhe stadiumet. Mediat vendase raportojnë se Chekmaryov ka thënë: “Jemi mësuar të përballojmë pak a shumë karkalecat, por këtë vit kam frikë se mund të gjendemi mes një skandali të madh ndërkombëtar.”

Ai ka shtuar se “karkalecat parapëlqejnë vendet ku ka shumë hapësirë jeshile, prandaj të mos turpërojmë veten përpara shoqërisë globale, sidomos kur të kemi vizitorë nga e gjithë bota.”

Chekmaryov ka theksuar se regjioni Volgograd, që ndodhet rreth 1000 km në jug të Moskës, është një vend delikat. Këtë verë finalet e Kupës së Botës do të zhvillohen mes 14 qershorit dhe 15 korrikut, me ndeshjet që do të luhen në 12 stadiume rreth e qark 11 qyteteve.