Dy kandidatët që janë futur në garë për të rivalizuar Armand Dukën, për postin e presidentit të FSHF-së kanë ngritur shumë akuza se këto zgjedhje po manipulohen. Por nga ana tjetër ka edhe akuza të rënda mes Dukës dhe Finos se po marrin suport politik për të kapur anëtarët e Asamblesë. Për këtë arsye Bashkim Fino dhe Shpëtim Hala janë shprehur se të gjitha ankesat e tyre ia kanë paraqitur UEFA-s dhe një përfaqësues i tyre do të mbërrijë në Shqipëri për të monitoruar zgjedhjet.
Situata e krijuar pas akuzave të dy kandidatëve, Fino dhe Duka, për ndërhyrje te politikës, ka bërë që UEFA të marrë vendimin për të dërguar në Tiranë një përfaqësues shumë të lartë të këtij institucioni.
Mësohet se Grikori Surkis, zëvendës presidenti i UEFA-s, do të vijë së shpejti në Shqipëri për të parë situatën nga afër. Ai do të takohet me kryeministrin Edi Rama si dhe presidentin Ilir Meta. Me ta do të diskutohet pjesa më e nxehtë e këtyre zgjedhjeve: përfshirja e politikës në sport.
