Tramezzani drejt Amerikës, sërish trajner i sulmuesit kuqezi

Trajneri italian, Paolo Tramezzani, raportohet se është i lidhur me një aventurë te Major League Soccer si trajner i Colorado Rapids. Sipas Calciomercato.it, marrëveshja është arritur mes palëve dhe pritet italiani të niset drejt Shteteve të Bashkuara të Amerikës për të zyrtarizuar transferimin.

Trajneri italian është shumë i njohur në Shqipëri për eksperiencën e tij të shkëlqyer si zëvendës i ish-trajnerit të kombëtares kuqezi, Gianni De Biasi, dhe të dy udhëhoqën përfaqësuesen tonë drejt kualifikimit për në Europianin “Francë 2016”. Një lidhje me kuqezinjtë të cilën Tramezzani duket se nuk ka ndërmend ta ndërpresë për asnjë arsye në botë. Nëse italiani do të finalizojë këtë transaksion, atëherë ai do të bashkohet te Colorado Rapids me sulmuesin e përfaqësueses së Shqipërisë, Shkëlzen Gashi.