Ish-ministri i Jashtëm, Tritan Shehu shprehet se vrasja e politikanit serb në Mitrovicë ka qëllime që të shkaktojë trazira në rajon.
I ftuar në rubrikën “Opinion” në Neës24, Tritan Shehu tha se vrasja e tij gjatë ditës së sotme në Mitrovicë është një akt me elemente terroriste dhe se vrasja e Ivanoviçit është një kambanë alarmi për rajonin, ku synohet të pengohet integrimi i vendeve të rajonit.
“Ata që kryen aktin kërkojnë tensione në rajon. Ngjarja fsheh elemente terroriste. Pasoja e parë është se Serbia ndërpreu bisedimet në Bruksel. Duhet të gjenden autorët, jo vetëm zbatuesit e aktit dhe të rifillojnë bisedimet Kosovë-Serbi. Është një kambanë alarmi për rajonin dhe është programuar një skenar i gjerë. Po tentohet pengimi i rrugës europiane të rajonit. Kosova ka shumë presion dhe elemente te caktuar kërkojnë destabilitet”, tha Shehu.
Ndër të tjera, ish ministri i jashtëm tha se Shqipëria nuk duhet të humbasë rolin e saj në rajon.
“Shqipëria ka pasur rol stabiliteti në rajon. Shqiptarët janë koshient se çdo të thotë të kesh rol stabilizues dhe nuk duhet të humbasim këtë rol. Të vjen keq të dëgjosh që Serbia ka rol stabilizues në rajon, pasi ky rol i përket Shqipërisë. Nuk duhet të humbasim rolin tonë si lider në rajon”, tha Shehu.
