Liverpool ka bërë të pamundurën, atë që asnjë ekip nuk e arriti pas më shumë se 20 javësh, thyen Manchester Cityn dhe i shkakton humbjen e parë. U deshën plotë 4 gola për të mposhtur djemtë e Guardiolas, të cilët u zgjuan shumë vonë, në fundin e takimit.
Pas 20 fitoreve dhe dy barazime, kryesuesit provojnë shijen e humbjes në një ndeshje që faktikisht ishin inferiorë ndaj kundërshtarit. Liverpool mori hak për humbjen 5-0 në fazën e parë dhe tregoi se mund të jetë i suksesshëm edhe pa Philipe Coutinho, që shkoi te Barcelona, pak ditë më parë.
Alex Oxlade-Chamberlain hap siparin e golave që në minutën e 10’, pas një asistimi nga braziliani Firmino. Futbollisti i ardhur nga Arsenal ka shënuar tre gola në 20 ndeshje me Liverpool, aq sa shënoi në 71 ndeshje me fanellën e “topçinjve”. Pjesa e parë u mbyll ë barazimin 1-1, pasi Sane shënon në mënyrë spektakolare nga një pozicion aspak i lehtë.
Pak minuta pasi fillon pjesa e dytë është Liverpool që shpërthen me dy gola të shpejtë, Mane dhe Firmino mposhtin Eduardon pas dy shpërqëndrimeve të mbrojtjes së Cityzen.
Salah kompletoi “pokerin”, me një gol nga një distancë më shumë se 30 metra. Goli i egjiptianit, i 18-i në këtë kampionat, ishte me të vërtetë spektakolar me një goditje nga rreth 35 metra, duke përfituar nga dalja e portierit Eduardo.
Në shtatë minutat e fundit, City reagoi duke shënuar dy gola, por pa prishur festën e Liverpool. Bernardo Silva shënoi golin e dytë për Manchester City, ndërsa Gundogan të tretin, duke sigluar rezultatin përfundimtar 4-3.
Skuadra e Jurgen Klopp ngjitet në vend të dytë me 47 pikë, aq sa Chelsea dhe Manchester United, por “djajtë” kanë luajtur një ndeshje më pak, atë që do të zhvillojnë nesër ndaj Stoke. Manchester City nuk rrezikon pozitat e pretendentit, pasi ka 62 pikë, pavarësisht nga kjo disfatë.
