Kryeministri i Kosovës, Ramush Haradinaj ka pritur sot në Prishtinë liderët politikë të APN-së dhe LRPDSH-së, të cilët i përgëzoi për fushatën e denjë elektorale, në favor të qytetarëve të Komunës së Preshevës.
Koalicionin parimor mes APN-së dhe LRPDSH-së, Haradinaj e përkufizoi si diçka shumë natyrale dhe rrjedhimisht në pajtim me mentalitetin e ri politik, i cili po krijohet në Preshevë.
Kreu i Komunës së Preshevës, Shqiprim Arifi dhe kryetari i LRPDSH-së Sami Salihu, kanë kërkuar nga kryeministri Haradinaj që shqiptarët e Luginës së Preshevës të jenë pjesë përbërëse e bisedimeve Kosovë-Serbi.
Në takim morën pjesë dhe kryetari i APN-së në Bujanoc, Arbër Pajaziti dhe zëvendëskryetari i APN-së Armend Aliu.
Nga ana e tij, kryeministri Haradinaj ftoi liderët preshevarë për unitet, ndërsa theksoi gatishmërinë e Qeverisë së Kosovës për të thelluar bashkëpunimin. Po ashtu, Haradinaj ka siguruar se Qeveria e Kosovës do të ndihmojë Luginën me tekste shkollore.
Në takim, u bisedua edhe për mundësitë e përkrahjes së Luginës në fushën ekonomike, të infrastrukturës, kulturës dhe arsimit.
