Kryeprokurorja Arta Marku shkarkoi sot nga detyra kreun e Prokurorisë së Elbasanit, Dritan Ginën, bashkëshort i prokurores Rovena Gashi.
Sigurisht, tashmë dihet përplasja Gashi-Marku, që kur kjo e fundit mori detyrën e saj.
Dritan Gina, i akuzuar nga prokurorja Xhaferri për zhdukjen e 3 dosjeve
Emri i Dritan Ginës bëri bujë në skadalin me dosjet e zhdukura në Prokurorinë e Elbasanit, në fillim të dhjetorit të vitit të kaluar.
Ishte prokurorja Armanda Xhaferri ajo që denoncoi zhdukjen e këtyre dosjeve, teksa kallëzoi kreun e Prokurorisë së Elbasanit, Dritan Gina, duke e akuzuar atë për “shpërdorim detyre”.
Prokurorja Xhaferi, e cila mësohet se ka rreth tre vite që është pjesë e organit të akuzës, pretendon se Dritan Gina, ka hequr në mënyrë të padrejtë dhe në kundërshtim me ligjin për funksionimin dhe organizimin e Prokurorisë së Përgjithshme tre procedime penale.
Sipas Xhaferrit, dosjet janë marrë pa dëshirën e saj, ndërsa ka kërkuar që këto dosje t’i rikthehen sërish asaj, por nuk i janë vënë në dispozicion.
Këto tre procedime penale, kanë qenë duke u hetuar pikërisht nga prokurorja Xhaferri, e cila ushtronte detyrën e saj pranë seksionit të Task-Forcës.
Nga ana tjetër, burime pranë prokurorisë së Elbasanit u shprehën për Top Channel se dosjet që prokurorja Amanda Xhaferri i ka denoncuar si të zhdukura nga zyra e saj, në fakt janë marrë me procesverbal dhe u janë deleguar për hetim prokurorëve të tjerë të njësisë task forcë Kundër Krimit Ekonomik dhe Korrupsionit.
Mësohet se drejtuesi i Prokurorisë së Elbasanit, Dritan Gina i ka hequr prokurores Amanda Xhaferri disa dosje me argumentimin së për një kohë të gjatë nuk kishte kryer veprime hetimore dhe këto dosje ia ka deleguar për hetime prokurorëve të tjerë.
Në zbatim të këtij vendimi të drejtuesit të Prokurorisë, janë tërhëqur edhe fizikisht dosjet nga zyra e prokurores Xhaferri për në zyrat e prokurorëve që kanë marrë në dorëzim çështjet.
Kjo ka sjellë edhe reagimin e prokurores, e cila e cilëson të paligjshme heqjen e çështjeve që po hetonte dhe në këto rrethana ka denoncuar në polici si të zhdukura dosjet.
“Kjo mënyrë veprimi që kanë hyrë në zyrën time, pa praninë time, pa dijeninë time dhe kanë marrë dosjet penale që unë kam patur në ndjekje penale, nuk është normale. Theksoj se, unë si prokurore kam përgjegjësi për materialet e administruara në fashikullin hetimor të çdo dosjeje dhe për më tepër, kur bëhet fjalë për dosje të rëndësishme dhe me materiale sekrete dhe delikate”, është shprehur prokurorja në dëshminë e saj. TIRANA TODAY
