Në një rrëfim 360 gradë, presidenti i FSHF-së flet për të gjitha ngjarjet e ndodhura në vitin 2017 dhe jo vetëm. Në intervistën e dhënë për Vilma Mashën në “Supersport”, kreu i FSHF-s Armand Duka, vazhdon të këmbëngulë se është kundër përfshirjes së politikës në sport dhe në këtë mënyrë është kundër kandidimit të Bashkim Finos.
Opinioni thotë se një ka kundërshtarët që do të keni përballë është Bashkim Fino, edhe pse ende ai nuk e ka bërë publike. Në emisionin e Sokol Ballës ju keni deklaruar se nëse ai e bën këtë gjë, le ta bëjë nga zyra e PS-së? Pse kjo deklaratë? Vazhdoni të mendoni ende kështu?
Federata është institucioni më i mirë në Shqipëri. Jemi në sport dhe nuk kemi kundërshtarë dhe armiq. Jemi në garë sportive alternativash. Për kandidatin aktual, unë kam njohje personale dhe e vlerësoj si njeri. Kemi bërë shkollën bashkë dhe e kam respektuar periudhën e tij si kryeministër në një moment të vështirë për Shqipërinë. Nëse Bashkimi do të jetë kandidat për president si përfaqësues i Partisë Socialiste, ai duhet të dalë nga zyrat e saj.
Nëse jo, partia duhet të bëjë të kundërtën dhe të thotë se distancohet nga kjo iniciativë që është e drejta e plotë e zotit Fino, e cila mund të jetë private. Partia Socialiste patjetër që do ta bëjë këtë gjë. Ose do ta vendosë si kandidatin e saj, ose do të thotë që është iniciativë private. Kjo do të jetë në të mirën e lojës që futbolli të mos jetë i varur nga politika.
