Britania duhet të arrijë një marrëveshje të fortë tregtare me Bashkimin Europian pas Brexit dhe të mos bëhet një shtet i varur nga blloku. Kështu ka deklaruar politikani Boris Johnson, i cili është shprehur prerazi se Mbretëria e Madhe nuk mund të bëhet një shtet vasal i BE-së.
“Dështimi për të hedhur poshtë ligjin e BE-së do ta bënte Mbretërinë e Bashkuar një shtet vasal”, tha sekretari i jashtëm për gazetën Sunday Times.
Kryeministrja Theresa May këtë javë siguroi një marrëveshje me BE-në për të zhvendosur bisedimet e Brexit në një pakt për tregtinë. Por ajo tani duhet të bashkojë kabinetin e saj të ndarë thellësisht mbi atë se çfarë dëshiron Britania në këtë marrëveshje tregtare.
May foli edhe për kritikët “anti-Brexit”, për të cilët tha se duan të zhvlerësojnë Britaninë. Ajo tha se “pavarësisht ‘zhurmës’ ne do të vazhdojmë punën”:
“Për kritikët që duan të hedhin Britaninë poshtë, ne po sigurojmë marrëveshjen më të mirë dhe më ambicioze të Brexit për të gjithë Mbretërinë e Bashkuar. Dhe mesazhi im sot është shumë i qartë: ne nuk do të largohemi nga kjo detyrë themelore për të vënë në vend vullnetin demokratik të popullit britanik”.
Në intervistë, Johnson tha se do të avancojë çështjen për një “Brexit liberal” në një ndërhyrje të re në debatin e kësaj jave, në të cilën ai do të nxjerrë në pah avantazhet e largimit nga BE.
Johnson shpalosi vizionin e tij për një marrëveshje tregtie BE-UK, e cila do të “maksimizonte përfitimet e Brexit” duke lejuar Britaninë të çlirohej nga ligjet e Brukselit.
Ai bëri thirrje për një marrëveshje që “na jep lirinë e rëndësishme për të vendosur kuadrin tonë rregullator, ligjet tona dhe për t’i bërë gjërat në mënyrë të veçantë”. TIRANA TODAY
