Botërori i Klubeve na rezervon një sfidë gjysmëfinale mjaft interesante, ku Al Jazira e sheikut Mansour do të përballet me gjigantët e Real Madrid. Është një sfidë e pastër ku paratë do të konkurrojnë me talentin. Sheiku që ka në pronësi ekipin e Al Jaziras, bën pjesë në tre njerëzit më të pasur në botë dhe ai ka një dëshirë që akoma nuk e ka realizuar, të pushtojë edhe botën e futbollit. Këtë gjë nuk e kërkon ta bëjë me Al Jaziran, pasi ai ka në pronësi edhe anglezët e Manchester Cityt që këtë vit duken në një formë të jashtëzakonshme nën drejtimin e Guardiolas.
Por sfida mes madrilenëve dhe Al Jaziras, mbetet interesante pasi spanjollët janë në kërkim të mbrojtjes së këtij titulli që e fituan një vit më parë, ndërsa nga ana tjetër është ekipi multimiliarderë që kërkon të futet në histori.
Po kush është sheiku Mansouri, që kërkon të sundojë në botën e futbollit?
Pronari i Manchester City, Mansour bin Zayed bin Sultan Al Nahyan, dhe 23 miliardë dollarët e tij duan të pushtojnë botën e futbollit. Presidenti i Al Jazira, skuadra që do të luajë kundër Real Madrid në gjysmëfinalen e Botërorit për Klube, beson se mund të blejë pothuajse gjithçka që do me paratë e tij, siç është parë edhe kohët e fundit me hapjen e Muezut të Louvre në Abu Dhabi. Gjithsesi, ai akoma nuk ka arritur të kapë majat e futbollit.
Të mërkurën, ai do të ulet në krah të Gianni Infantino, presidenti i FIFA-s, dhe Florentino Perez, presidenti i Real Madrid. Por ai e di se skuadra e tij nuk do ta ketë të lehtë kundër Real Madrid, me gjigantët spanjollë që synojnë të mbrojnë titullin e fituar një vit më parë. Mansour konsiderohet të jetë një prej tre njerëzve më të pasur në botë. 48-vjeçari është një anëtar i familjes mbretërore të Abu Dhabi dhe vëllai i Khalifa bin Zayed bin Sultan Al Nahyan.
Në 2016-ën, ai bleu një fermë ne 8.2000 hektarë në Valencia de las Torres, një qytet në krahinën e Badajoz. Ai zotëron edhe 32% e “Virgin Galactic”, një kompani që është pjesë e “Vrigin Group” dhe që po planifikojnë të ofrojë, për ata që do të kenë mundësi ekonomike, fluturime në hapsirë. Sheiku Mansour është një kalorës ekspert dhe president i Horse Racing Authority të Emirateve Arabe. Përveç këtyre, ai ka edhe një koleksion të pakrahasueshëm makinash, një jaht prej 180 metrash, më i gjati në botë. Ai është edhe anëtar i Këshillit Suprem të Naftës, organi që kontrollon naftën, gazin dhe industri të tjera në Abu Dhabi.
Në 2015-ën ai ka shitur 13% të Manchester City për 376 milionë euro, të njëjtën shumë që shpenzoi për ta blerë klubin anglez në 2008-ën. Problemi është se gjithë kjo pasuri nuk po i jep atij atë që do më shumë; të kontrollojë botën e futbollit ose të paktën të ketë një skuadër që e bën një gjë të tillë. Por, duke parë marshimin e pandalshëm të ekipit të Guardiola-s, mund të thuhet se është në rrugën e duhur. Të mërkurën, ai do të duhet të kënaqe duke parë Al Jazira-n e tij që do të luftojë me Real Madrid për një biletë në finalen e Botërorit për klube.
