Partia Demokratike e Kosovës vijon të mbajë qendrim të njejtë për çështjen e Demarkacionit. Kreu i saj, Kadri Veseli, ka ritheksuar dhe njëherë se partia e tij do të votojë këtë marrëveshje sapo ajo të shkojë në Kuvend.
Në një intervistë televizive, ai ka bërë thirrje që vendi të mos mbetet i penguar për shkak të folklorizmave dhe emocioneve të gabuara. Veseli ka theksuar se mbrojtja e Demarkacionit, po bëhet pa informacionet e duhura dhe me kompetenca më të mëdha se sa duhet të ishin.
“Qëndrimi i PDK-së mbetet i qartë. Demarkacioni duhet të votohet. PDK do ta votojë marrëveshjen ditën e parë që vjen në Kuvend. Qytetarët e Kosovës nuk e meritojnë të mbahen të izoluar. Njëjtë ndikohet edhe FSK. Kemi të bëjmë me një shtet i cili është partner i NATO-së”- ka thënë Veseli në KTV
Ai shprehet i bindur se Kosova nuk po humb sipërfaqe toke nga vija e demarkacionit, por nuk mund ta lëmë vendin peng të fatkeqësive tona historike. Veseli shpjegoi se Gjykata Ndërkombëtare nuk flet me emocione dhe as me folklorizma.
“Nuk duhet të mbetemi peng i fatkeqësive tona historike. Shteti i Kosovës është i shenjtë dhe duhet të ecë përpara, jemi me fat që kemi këta partnerë. Sinjalet e mesazhet janë të qarta dhe në të njëjtën kohë nuk ka asnjë argument, edhe të komisionit të ri që do të mund të na vërtetonte diçka tjetër. Në fund nuk kemi asnjë argument, Gjykata Ndërkombëtare nuk flet me emocione”-shjegon ai.