Pjetri Marku , një kosovar 46-vjeçar që jeton në Brugg (AG) kishte humbur portofolin e tij në një kantier pune, në vitin 2007. Ai e kishte harruar rastin e kuletës së zhdukur, kur punonte si montator në një kantier ndërtimi në Hwrkingen të Solothurnit, shkruan 20minuten.ch.
Por më shumë se çdo gjë tjetër që kishte në kuletë i ishte dhimbsur kartemonedha 20 frangëshe. “Ishte me ngjyrë të kaltër, nga gjenerata paraprake”, thekson Marku, i cili e kishte ruajtur atë kartëmonedhë si një kujtim që nga viti 1989.
“Në atë kohë unë kisha ardhur nga Kosova në Zvicër dhe me vete kisha vetëm këto 20 franga”, sqaron ai.
Së bashku me kolegët e punës kishin kontrolluar gjithë kantierin, por pa sukses. “Shpresa se do ta kisha sërish portofolin tim në duar më humbi shpejt”, thotë Marku.
Por, çudia ndodhi pak ditë më parë kur atë e telefonuan nga qendra e paketimit. Një punëtor i tha se kuleta e tij ishte gjetur nën një makinë.
Marku fillimisht mendoi se bëhej fjalë për ndonjë keqkuptim. “Iu përgjigja se unë kuletën time e kisha në xhep”. Por shpejt kuptohet se bëhej fjalë për kuletën e humbur para 10 vitesh. Ai shkoi në Härkingen dhe e mori atë. Dhe ç`të shihte! Çdo gjë ishte në kuletë, nuk i mungonte asnjë cent. Po ashtu aty ishin edhe dokumentet e identitetit, kartelat e bankës etj.
“Më së shumti më gëzoi, natyrisht, fakti kartmonedha 20 eurosh ishte brenda”, thotë Marku. Ai, nga e gjithë kjo ka nxjerrë tashmë një përfundim: “se zviceranët janë njerëz me të vërtetë të ndershëm”.
