Marrëveshja e Britanisë me Bashkimin Evropian për të kaluar në fazën e ardhshme të negociatave për Brexit ka dështuar sërish, shkruan eureporter.co.
Këtë e ka bërë të ditur kryeministrja britanike Theresa May e cila ka thënë që është arritur progres, megjithatë ka dallime në disa çështje.
Ajo ka shtuar që bisedimet do të fillojnë në fund të javës dhe beson që do të rezultojnë pozitive. Qëllimi i May është që të finalizohet marrëveshja para samitit, brenda dhjetë ditëve.
Juncker tha se “nuk ishte e mundur që të arrihej një marrëveshje e plotë sot në Bruksel, por kjo nuk ishte ‘një dështim”, gjithashtu ai deklaroi “jam i bindur se mund të arrijmë progres të mjaftueshëm përpara takimit të Këshillit Evropian”.
Negociatat aktualisht janë përqendruar në çështje si kufiri i Britanisë me Irlandën apo fatura e divorcit që Londra do të paguajë për të përfunduar shkëputjen.
Bashkimi Evropian nuk pranon të hapë bisedimet për marrëdhënien e ardhshme tregtare mes palëve, derisa Britania të ketë arritur progres të mjaftueshëm lidhur me çështjet e sipër-përmendura. Kujtojmë se Mbretëria e Bashkuar votoi për shkëputjen nga blloku një vit më parë dhe parashikohet të largohet në marsin e 2019.
