Presidenti amerikan Donald Trump mbron veprimet e Michael Flynn në fushatën zgjedhore. Trump në një postim në rrjetin social “Twitter” tha se veprimet e ish këshilltarit të sigurisë kombëtare, Michael Flynn pas zgjedhjeve presidenciale 2016 ishin të ligjshme. Presidenti u shpreh se e shkarkoi Flynn sepse gënjeu nënpresidentin dhe FBI-në.
“M’u desh të pushoja nga puna gjeneralin Flynn sepse ai gënjeu zëvendëspresidentin dhe FBI-në. Ai ka pranuar fajin për këtë. Është për të ardhur keq sepse veprimet e tij gjatë tranzicionit kanë qenë në përputhje me ligjin. Nuk kishte gjë për të fshehur”, shkruan Trump në Twitter.
Trump tha se nuk ka patur asnjë bashkëpunim mes fushatës së tij presidenciale dhe Rusisë. “Ajo që ka dalë është se nuk ka patur bashkëpunim, asnjë bashkëpunim”, tha për median zoti Trump ndërsa u largua nga Shtëpia e Bardhë për në Nju Jork.
