Kamza vazhdon të surprizojë duke marrë rezultate të mira në Superligë, këtë herë e kishte radhën Teuta e cila u mposht në shtëpi me rezultatin e ngushtë 1-0. Tekniku Ramadan Ndreu është i kënaqur me rezultatin por jo me lojën që u pa në fushë, pasi duke pasur parasysh epërsinë numerike duhet ta kishin mbyllur ndeshjen më parë.
“Jam i kënaqur për fitoren, por jo për takimin, pasi duhet ta kishim mbyllur më përpara ndeshjen, duke shfrytëzuar epërsinë numerike. Gjithsesi, është e pritshme të ulet marshi në të tilla situate, ndaj më pëlqeu administrimi i lojës”, tha trajneri i Kamzës.
Ndreu ka shumë besim tek lojtarët që ka dhe nuk mendon të largojë ndonjërin prej tyre në janar, ai është shprehur se Kamzës i duhet vetëm një lojtarë me aftësi të mira organizative dhe do të arrijë objektivin e vendosur në fillim të sezonit, qëndrimin në Superligë.
“Nëse ky grup lojtarësh do të vazhdojë me këtë ritëm, mund të arrijë shumë. Jemi skuadër e re dhe duam të sigurojmë sa më shpejt qëndrimin në Superligë, por gjithsesi, shpresoj të vijojmë me këto paraqitje dhe të mbetemi në 4-shen e parë të renditjes. Ne nuk do të largojmë asnjë lojtar në muajin janar, ndërsa do të kisha dëshirë të afronim një mesfushor me aftësi të mira organizuese”, tha Ramazan Ndreu.
Gugash Magani
Magani është i zhgënjyer nga kartoni i kuq i Dedicit dhe është shprehur se do të merret me këtë çështje pasi është rast që përsëritet. Ne nuk zbritëm në fushë me moralin që duhej dhe këtu kam përgjegjësi edhe un, por kam rezervat e ia tek rasti për penallti i Lenës që nuk u akordua.
“Kemi zhvilluar një ndeshje shumë të dobët dhe merituam humbjen, ndërsa Kamza fitoren. Nuk u futëm në fushë në mënyrën e duhur për të përballuar këtë ndeshje dhe për këtu kam edhe unë përgjegjësitë e mia. Gjithsesi, nuk mund të tolerojmë gabimet amatore si ai i Lenës në rastin e pësimit të golit dhe atë të Dediçit, në marrjen e kartonit të kuq. Boshnjaku e përsërit këtë veprim për herë të dytë dhe lë skuadrën në baltë, ndaj do të merremi me këtë çështje. Në fakt, kam pretendimet e mia edhe për një 11-metërsh, që nuk na u akordua”, tha trajneri i Teutës.
Magani pranoi se edhe euforia e ndeshjeve të fundit mund të ketë ndikuar në mënyrën e interpretimit të takimit të sotëm, ndërsa paralajmëroi edhe njëherë ndryshime në merkaton e janarit.
“Natyrisht që rezultatet pozitive krijuan një lloj euforie, sepse ne jemi një ekip i brishtë, por duhet të mundohemi të marrim maksimumin deri në janar, kur presim të bëjmë disa ndërhyrje për të mirën e ekipit”, u shpreh peqinasi i Teutës.
