Disa video të rishpërndara nga presidenti i SHBA-ve, Donald Trump, kanë shkaktuar reagime të shumta.
Video kishin përmbajtje anti-islame, gjë që ka sjellë reagime edhe nga personalitete të njohura.
Në një prej videove të rishpërndarë në Twitter shfaqeshin pamje të një të riu, i cili dhunonte një djalë me paterica, ndërsa përshkrimi ishte: “Emigranti mysliman dhunon djalin holandez me paterica”.
Veç kësaj video, Trump shpërndau edhe dy video të tjera të publikuara nga ekstremistja Jayden Fransen, e partisë “Britain First”.
Trump publikoi edhe një video ku dukej një person që thyente statujën e Virgjëreshës Mari. Sipas Daily Mail, dy prej videove rezultojnë se janë të paktën 5 vjet të vjetra.
Gjithsesi, Shtëpia e Bardhë u justifikua se “kërcënimi është koherent dhe real”. Ndërkohë policia holandeze ka deklaruar se qyteti i cilësuar si “emigrant” në fakt është një shtetas holandez.
Videot kanë shkaktuar zhurmë edhe në Britaninë e Madhe. Kështu, zëdhënësi i kryeministres së Britanisë tha se veprimi i presidentit Trump është një gabim nga ana e tij. Gjithsesi, ai bëri me dije se ftesa ndaj Trump për të vizituar Mbretërinë e Bashkuar qëndron ende.
“Ftesa për një vizitë shtetërore është zgjeruar dhe pranuar. Detajet e mëtejshme do të shpallen në kohën e duhur”, tha zëdhënësi.
Por, duket se Trump nuk është i mirëpritur në Mbretërinë e Bashkuar. Kryebashkiaku i Londrës, Sadik Khan tha se “Britain First” është një organizatë e urryer dhe e mjeruar, pikëpamjet e së cilës duhet të dënohen.
Jeremy Corbyn po ashtu i kërkoi Theresa May që të marrë një qëndrim të ashpër kundër Presidentit Trump.
Një tjetër deputet, Chuka Umunna tha: “Unë nuk mendoj se presidenti i SHBA-ve, një president i cili ka promovuar fanatizmin, mizorinë dhe racizmin në vendin e tij, është i mirëpritur këtu. Unë mendoj se ftesa që i është bërë atij që të vijë në vendin tonë në fillim të vitit 2018 duhet të tërhiqet.” TIRANA TODAY
