Zyrtarë në Egjipt kanë investiguar mbi masakrën që ndodhi dje në një xhami në Egjipt, teksa qindra besimtarë po faleshin. Edhe pse asnjë grup terrorist nuk e ka marrë ende përgjegjësinë mbi sulmin, mësohet se autorët mbanin flamurin e grupit terrorist ISIS.
Të paktën 315 persona humbën jetën pas sulmit masakrues, ndërsa mendohet se autorët kanë qenë rreth 30 vetë. Këta të fundit kanë hedhur bomba brenda xhamisë, ndërsa më pas kanë qëlluar besimtarët me armë.
“Kur dëgjuam të shtëna, të gjithë filluam të vraponim. Arrita të dalloj autorët e maskuar që kishin veshje militanti. Ata hynë brenda në xhami, ishin rreth 10-20 persona të armatosur dhe shkatërruan gjithçka. Disa u plagosën, por shumica u vranë”, tha Magdy Rezk, i mbijetuar i sulmit ku vdiqën 305 persona.
Presidenti i Egjiptit Abdul Fattah al-Sisi tha se do të përgjigjet në mënyrën më të egër. Tridhjetë fëmijë janë në mesin e të vdekurve dhe së paku 100 vetë janë plagosur.
“Ajo që po ndodh është një përpjekje për të na ndaluar nga përpjekjet tona në luftën kundër terrorizmit”, tha presidenti Abdel Fattah el-Sisi pak orë pas sulmit.
“Forcat e armatosura dhe policia do të hakmerren për martirët tanë dhe do të rivendosin sigurinë dhe stabilitetin me forcën më të madhe”.
Forcat e sigurisë egjiptiane për vite kanë luftuar një kryengritje islamike në gadishullin Sinai dhe militantët e lidhur me të ashtuquajturin Shtetin Islamik (ISIS) kanë qëndruar pas një sërë sulmesh vdekjeprurëse në rajonin e shkretëtirës.
Vendorët thonë se xhamia Al-Rawda është përdorur nga fisi Sawarka, i cili është i njohur për bashkëpunimin me shërbimet e sigurisë kundër militantëve.
Numri i viktimave është i pashembullt për një sulm të këtij lloji, thotë Sally Nabil i BBC-së në Kajro. Ajo shton se kjo është hera e parë që adhuruesit brenda një xhami janë vënë në shënjestër nga militantët në Sinain e Veriut.
“Do të telefonoj presidentin e Egjiptit për të diskutuar mbi sulmin terrorist tragjik me kaq shumë humbje jetësh. Duhet të tregohemi më të ASHPËR DHE TË ZGJUAR se kurrë më parë, dhe do ta bëjmë. Na duhet muri, na duhet ndalimi. Zoti i bekoftë njerëzit e Egjiptit”, shkroi Trump në Twitter.
Një zëdhënës i ushtrisë tha se “vende terroriste” ishin bombarduar nga avionët e ajrit të premten në përgjigje. Zyrtari tha gjithashtu se disa automjete të përdorura në sulm ishin gjetur dhe shkatërruar. Janë shpallur tri ditë zie kombëtare.
Shefi i Lidhjes Arabe Ahmed Aboul Gheit e dënoi sulmin si një “krim të tmerrshëm që tregon përsëri se Islami është i pafajshëm për ata që ndjekin ideologjinë terroriste ekstremiste”.
Qeveritë në Britani të Madhe, SHBA, Francë, Rusi, Izrael, Iran, Arabinë Saudite dhe vende të tjera kanë dënuar masakrën. TIRANA TODAY
