Presidenti i Egjiptit Abdul Fattah al-Sisi është zotuar të përgjigjet me “forcën më të madhe” pasi 300 vetë u vranë në një xhami të Sinai Veriut gjatë lutjeve të së premtes.
Xhamia Al-Rawda në qytetin Bir al-Abed në Egjipt u bombardua, ndërsa më pas besimtarët u vranë me armë. Ushtria egjiptiane ka thënë se ka kryer sulme ajrore mbi objektivat “terroriste” në përgjigje të sulmit.
Asnjë grup nuk e ka marrë përgjegjësinë mbi sulmin më vdekjeprurës në muajt e fundit. Pasi u hodhën bombat, dhjetëra njerëz të armatosur që prisnin jashtë xhamisë hapën zjarr mbi ata që përpiqeshin të shpëtonin.
Madje, raportohet se sulmuesit kanë djegur automjetet pranë për të bllokuar mundësinë e largimit të qytetarëve, si dhe u kanë vënë flakën ambulancave që tentonin të shpëtonin të plagosurit.
Tridhjetë fëmijë janë në mesin e të vdekurve dhe së paku 100 vetë janë plagosur.
“Ajo që po ndodh është një përpjekje për të na ndaluar nga përpjekjet tona në luftën kundër terrorizmit”, tha presidenti Abdel Fattah el-Sisi pak orë pas sulmit.
“Forcat e armatosura dhe policia do të hakmerren për martirët tanë dhe do të rivendosin sigurinë dhe stabilitetin me forcën më të madhe”.
Forcat e sigurisë egjiptiane për vite kanë luftuar një kryengritje islamike në gadishullin Sinai dhe militantët e lidhur me të ashtuquajturin Shtetin Islamik (ISIS) kanë qëndruar pas një sërë sulmesh vdekjeprurëse në rajonin e shkretëtirës.
Vendorët thonë se xhamia Al-Rawda është përdorur nga fisi Sawarka, i cili është i njohur për bashkëpunimin me shërbimet e sigurisë kundër militantëve.
Numri i viktimave është i pashembullt për një sulm të këtij lloji, thotë Sally Nabil i BBC-së në Kajro. Ajo shton se kjo është hera e parë që adhuruesit brenda një xhami janë vënë në shënjestër nga militantët në Sinain e Veriut.
Një zëdhënës i ushtrisë tha se “vende terroriste” ishin bombarduar nga avionët e ajrit të premten në përgjigje. Zyrtari tha gjithashtu se disa automjete të përdorura në sulm ishin gjetur dhe shkatërruar. Janë shpallur tri ditë zie kombëtare.
Shefi i Lidhjes Arabe Ahmed Aboul Gheit e dënoi sulmin si një “krim të tmerrshëm që tregon përsëri se Islami është i pafajshëm për ata që ndjekin ideologjinë terroriste ekstremiste”.
Qeveritë në Britani të Madhe, SHBA, Francë, Rusi, Izrael, Iran, Arabinë Saudite dhe vende të tjera kanë dënuar masakrën.
“Do të telefonoj presidentin e Egjiptit për të diskutuar mbi sulmin terrorist tragjik me kaq shumë humbje jetësh. Duhet të tregohemi më të ASHPËR DHE TË ZGJUAR se kurrë më parë, dhe do ta bëjmë. Na duhet muri, na duhet ndalimi. Zoti i bekoftë njerëzit e Egjiptit”, shkroi Trump në Twitter. TIRANA TODAY
[ngg_images source=”galleries” container_ids=”620″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
