Skënderbeu ka arritur të marrë një fitore të madhe në sfidën përballë kryesuesve të grupit në Europa League, Dinamo e Kiev. Ndeshja u zhvillua në “Elbasan Arena” dhe u fitua nga korçarët me rezultatin e thellë 3-1, duke mbajtur gjallë shpresat e një kualifikimi përtej fazës së grupeve, por që gjithcka varej nga rezultati i Partizanit të Beogradit me Young Boys.
Pjesa e parë ka filluar me ritme të larta me shumë raste nga të dyja kampet. Por janë miqtë që arrijnë të gjejnë golin e parë në minutën e 16’ me anë të një aksioni mjaft të rrjedhshëm të ukrainasve që përfundon në rrjetë.
Ndërsa dy minuta më vonë ka ardhur edhe goli i barazimit me anë të një goditje mjaft të bukur nga Sabien Lilaj. Ky i fundit godet fort nga jashtë zone dhe pas një devijimi të lehtë topi përfundon në rrjetë. Ky reagim i shpejtë i korçarëve sjell edhe optimizëm për të tentuar më shumë. Pjesa e parë mbyllet me këtë rezultat, por me një dominim të dukshëm nga Skënderbeu.
Në pjesën e dytë zbret në fushë një Skënderbe tepër sulmues dhe i uritur për të shënuar. Është James që shënon golin e avantazhit në minutën e 52’. Pas një goditje dënimi topi përfundon në këmbët e Micit në të majtë, ky i fundit kroson në zonë dhe Soue ul topin me kokë për James i cili nga shumë pranë vijës fatale e ka të lehtë të shënojë.
Ndërsa vetëm katër minuta më vonë do të vinte edhe goli i tretë dhe i sigurisë. Këtë herë është Gavazaj që vertikalizon një top perfekt për sulmuesin Soue, i cili shkëputet duke shmangur edhe portierin dhe dërgon qetësisht topin në rrjetë. Ky ishte dhe goli i nokautit për ukrainasit e Dinamos që edhe pse mposhten mbajë vendin e parë dhe kanë të sigurt kualifikimin.
Në minutat e fundit Dinamo i Kiev arrin të ngushtojë diferencën me një aksion mjaft të bukur që finalizohet në rrjetë nga Rusyn.
Në pjesën e mbetur të ndeshjes lojtarët e Ilir Dajës kishin për detyrë vetëm të administronin rezultatin dhe të shpresonin tek një surprizën në Beograd, ku zviceranët e Young Boys të mos mposhteshin. Por Partizani fiton me rezultatin 2-1 dhe siguron kualifikimin, duke shuar shpresat e korçarëve.
