Çështja e gjuhës shqipe është diskutuar mjaft në median maqedonase dhe jo vetëm. Përpjekjet për zyrtarizim e shqipes si gjuhë e dytë zyrtare në institucionet e Maqedonisë ka bërë që të ketë përplasje të forta mes politikanëve. Akoma nuk kemi një vullnet politik që kjo çështje të zgjidhet nga klasa politike maqedonase me gjithë vullnetin e mirë të ndërkombëtarëve dhe BE-së që kjo çështje të zgjidhet sa më parë.
Shumica parlamentare pret që kryetari i Kuvendit Talat Xhaferi të vendos në rend të ditës vazhdimin e leximit të parë. Propozuesit janë të gatshëm të bëjnë edhe ndryshime eventuale në tekst.
Deputet i LSDM-së, Tomisllav Tuntev u shpreh se “jemi seriozisht të përgatitur për të ndërhyrë në përmirësimin e tekstit në drejtim të anashkalimit të të gjitha dilemave dhe lëshimeve.”
Opozita mbetet në qëndrimin se ky propozim-ligj nuk zyrtarizon por vetëm avancon gjuhën shqipe në organet shtetërore. Lëvizja Besa vlerëson se mazhoranca nuk ka vullnetin e mëparshëm për zbatimin e këtij ligji.
Deputet i Lëvizjes Besa, Fadil Zendeli, tha “me siguri pasi bëhet zvarritja e këtij procesi nga ana e shumicës parlamentare, kjo le të kuptohet se ka mëdyshje brenda tyre, rreth përmbajtjes së ligjit apo mënyrave se si ata do të mund të vijnë deri tek shumica që do ta aprovojë këtë ligj.”
Pas leximit të parë, Kuvendi do të kalojë propozim-ligjin në leximin e dytë. Në këtë fazë parashtrohen amendamentet, ndërsa debati nuk është i kufizuar.
