Ambasadori i Rusisë në Serbi, Alexander Cepurin ka provokuar teksa është shprehur se sipas ligjeve ndërkombëtare, Kosova është pjesë e Serbisë.
Në një intervistë për gazetën ruse “Sputnik”, Cepurin tha se Rusia dhe Serbia kanë interesa të përbashkëta dhe se Kosova mbetet pjesë e Serbisë duke shtuar se Rusia mbështet integritetin serb:
“Për çështjet e rëndësishme Rusia dhe Serbia kanë interesa të përbashkëta. Sa i përket Kosovës, sipas të gjitha ligjeve dhe rregullave ndërkombëtare, Kosova mbetet pjesë e Serbisë, dhe ne e mbështesim integritetin serb”, tha Cepurin.
Duke iu referuar deklaratave të zyrtarit amerikan Hoyt Yee se Serbia nuk mund të ulet në dy karrige, Cepurin tha se këtyre deklaratave nuk u duhet kushtuar shumë rëndësi, pasi sipas tij, deklarata është ekzagjeruar në masë të madhe:
“Një vizitë diplomatike është e ministrit, kryeministrit apo presidentit. Vizita e Yee nuk mund të karakterizohet si vizitë zyrtare, por udhëtim apo udhëtim pune”, tha me ironi Cepurin.
Më tej, ambasadori rus pretendoi se qëndrimi i zëvendës-ndihmës sekretarit amerikan nuk e përfaqëson qëndrimin zyrtar të SHBA-ve, ndërsa shtoi se Amerika nuk duhet të sillet sikur të ishte pjesë e Bashkimi Evropian.
“Përshtypja është se Amerika është përfaqësuese e BE-së, por situata nuk është krejt e qartë. SHBA është jashtë Bashkimit Evropian. Ne dhe shumë vende tjera kemi punuar dhe bashkëpunuar për të mirën e BE-së”, deklaroi ambasadori rus.
