Ministri i Jashtëm grek, Nikos Kotzias ka folur lidhur me shembjen e disa banesave në Himarë. I pyetur nga një gazetar, Kotzias tha se Athina zyrtare nuk ka reaguar, pasi është premtuar që pronarëve të një karburanti, i cili u shemb në Himarë do t’i jepet truall dhe licencë diku tjetër.
Sipas Kotzias, këtë premtim e ka dhënë zv/ministri i Energjetikës pas konsultimeve me shefat e tij politik në Tiranë.
Ndërsa lidhur me godinat e tjera, Kotzias ka thënë se ato janë tërësisht pa pronarë, pra pa leje, për rrjedhojë askush nuk mund të marrë në mbrojtje këto prona, gjersa pronarët nuk kanë mundur të sigurojnë tituj pronësie.
“S’mund të ndalohet plani i zhvillimit të një vendi tjetër, por ajo që Athina ka detyrë është që të merren në mbrojtje ata pronarë me tituj pronësie dhe që të marrin dëmshpërblimin e tyre me vlerën e tregut”, ka deklaruar ministri grek.
Kotzias tha se Athina pret që të plotësohet ky premtim i palës shqiptare.
Kështu, heshtja e Athinës duket se qenë produkt i negociatave mes Athinës dhe autoriteteve politike shqiptare.
