Presidenti i Kosovës, Aleksandër Vuçiç deklaroi se perëndimi nuk do të heqë dorë nga Kosova, ndërsa shtoi se Beogradi duhet të gjejë një zgjidhje për marrëdhëniet me shqiptarët.
Në një intervistë me televizionin serb “Pink”, Vuçiç ka dhënë detaje për takimin e një jave më parë me zyrtarin e lartë amerikan, Hoyt Brian Yee.
Ky i fundit kishte deklaruar pak kohë më parë se Serbia “nuk mund të ulet në dy karrige”. Yee është treguar mjaft i prerë edhe në takimin me Vuçiç, teksa ky i fundit tha në intervistë se takimi me zyrtarin amerikan “nuk ishte i këndshëm, por nuk pati fjalë të rënda”.
Sipas Vuçiç, në fokus të takimit ishin Kosova dhe Rusia, ndërsa rrëfen ndër të tjera se Yee i kishte thënë se Serbia nuk mund të prekë tërësinë tokësore të Kosovës:
“Ai (Hoyt Brian Yee) më tha se nuk mund të prekni tërësinë tokësore të Kosovës, ndërsa unë i thashë, ju keni mundur të prekni tërësinë e Serbisë nëntë vjet më parë. Atëherë vlenin rregulla të tjera. Ai më bëri të ditur se më përcolli mesazhin e Amerikës. Duhet ta respektosh, nëse nuk e bën, dihen pasojat”, tha presidenti serb.
“Ajo çfarë po ndodh në Amerikë ka sjellë probleme të reja. Të gjithë ata që kanë çfarëdo marrëdhëniesh me Rusinë do ta pësojnë”, tha presidenti serb duke nënvizuar se nuk do të jetë e lehtë të “përballen trysnitë”.
SHBA-të kanë shprehur shqetësim për një qendër të emergjencave që Rusia menaxhon në qytetin e Nishit në Serbinë jugore, ndërsa disa grupe perëndimore dhe analistë ushtarakë e shohin si një bazë ushtarake të kamufluar që Kremlini e ka ngritur për të mbikëqyrur interesat amerikane në Ballkan.
Qendra ruse gjendet pranë forcës paqeruajtëse prej 4 mijë trupash në Kosovë, ndërsa pjesë e forcave ndërkombëtare në Kosovë janë edhe 600 ushtarë amerikanë.
Moska kërkon që personelit të saj t’i jepet imunitet diplomatik, ndërsa mohon çfarëdo veprimtarie të saj përveç trajtimit të emergjencave, si dhe mbështet pretendimet serbe mbi Kosovën dhe refuzon të njohë pavarësinë e saj të shpallur në shkurt të vitit 2008.
Po ashtu, Moska i dorëzoi Serbisë ditë më parë gjashtë avionë ushtarakë MiG-29, ndërsa pritet që të dërgojë në Beograd edhe 30 tanke T-72 dhe 30 automjete të blinduara.
“Serbia duhet të provojë të gjejë një marrëveshje historike me shqiptarët për hir të së ardhmes së fëmijëve”, tha presidenti serb, ndërkohë që marrëveshja me Kosovën mbetet një kusht për integrimin e Serbisë në BE.
