Kosova do të aplikojë për marrjen e statusit të vendit kandidat në Bashkimin Evropian deri në fund të 2018-ës, në mënyrë që të fitojë statusin e kandidatit deri në 2020-ën.
Kështu është shprehur ministrja e Integrimeve Evropiane, Dhurata Hoxha, e cila shtoi se me një vullnet dhe konsensus nacional mund ta kthejnë Kosovën në një vend potencial për integrim në BE.
“Ne e kemi bërë shumë të qartë se për sa i përket integrimeve evropiane, objektivi është që të kandidojmë për statusin e kandidatit deri në fund të vitit 2018 dhe ta marrim statusin e vendit kandidat deri në 2020. Sidoqoftë, edhe pse kjo është ambicioze unë mendoj se në qoftë se kemi të gjithë vullnet politik, përkushtim të ministrive, të institucioneve, popullatën tonë, vendin tonë të vogël mund ta kthejmë në potencial. Për të ndodhur kjo, Kosova duhet të arrijë progres në procesin e ERA-s dhe implementim të MSA-së”, ka thënë Hoxha në një intervistë për Ekonomia Online.
Ministrja i dha një rëndësi të madhe progresit në procesin e ERA-s dhe implementimin e marrëveshjes së MSA-së, në mënyrë që ta shfrytëzojnë në funksion të reformave të ndërmarra për aplikimin e Kosovës për statusin e kandidatit.
“Ne nuk mund të kandidojmë për statusin e kandidatit nëse nuk arrijmë progres në procesin e ERA-s, nëse nuk arrijmë progres në implementimin e marrëveshjes së MSA-së, pra të dyja këto procese ne duhet t’i shfrytëzojmë në funksion të progresit tonë të gjithëmbarshëm dhe të reformave të ndërmarra në funksion të aplikimit të vendit për statusin e kandidatit, nuk mundemi të aplikojmë nëse nuk prodhojmë rezultate.”
Po ashtu Hoxha, ka thënë se vendi ka dëshmuar se ka konsensus nacional për integrimet evropiane duke përmendur edhe rolin që ka opozita në këtë proces:
Këtë do ta bëjmë në koordinim të ngushtë me institucionet Bashkimin Evropian, dhe gjithashtu me spektrin politik brenda Kosovës dhe vendeve kyçe vendimmarrëse në Bashkimin Evropian, pra duhet të bëhet një koordinim i plotë. Këtu dua të theksoj rëndësinë e konsensusit nacional dhe përkrahjen e të gjitha partive politike qoftë në parlament kur janë reformat të votohen Ligje të ndryshme, plotësim ndryshimi i legjislacionit, përafrimi i legjislacionet me atë të BE që është një ndër kriteret kyçe na nevojitet ky konsensus. E kemi fatin u dëshmua me ratifikimin e marrëveshjes IPA javë më parë në parlament, u demonstrua se fatmirësisht ky konsensus nacional për integrimin evropian ende vazhdon sepse marrëveshja u votua nga të gjithë deputetët për çka edhe i falënderoj.
