Skënderbeu është duke bërë mjaft mirë në kampionatin shqiptarë, duke mbajtur vendin e parë dhe duke treguar një nivel të lartë në fushë. Edhe pse kanë impenjime në Europa League, korçarët nuk kanë treguar lodhje fizike. Tekniku Ilir Daja është ndalur të flasë për mediat në prag të ndeshjes me Luftëtarin, ku bardhekuqtë do të kërkojnë fitoren e radhës për të vazhduar arritjen e objektivit, fitimin e kampionatit.
Ilir Daja: “ Tashmë jemi mësuar të zhvillojmë ndeshje në çdo 4-5 ditë dhe kjo nuk përbën problem për ne. Lodhja tek ne është mendore, por besoj se nuk do të ndikojë në fushën e lojës. Ajo që na ka hapur më shumë punë në këtë kampionat kanë qenë dëmtimet e shumta dhe nevoja për të bërë rrotacion në çdo ndeshje. Nesër do të hedhim në fushë lojtarët më të mirë dhe kërkojmë fitoren me çdo kusht. Unë shoh një dëshirë të madhe tek lojtarët e mi për të fituar çdo ndeshje dhe kjo na e bën më të lehtë të interpretojmë në fushë atë që përgatisim në stërvitje. Sa i përket çështjes së titullit, unë e kam thënë që është objektivi ynë primarë dhe me çfarë kam parë në këto shtatë javë është i arritshëm. Kam një kontingjent lojtarësh të mirë dhe jam i lumtur që po i trajnoj.”
Krah teknikut Daja ka qenë edhe mesfushori Sabien Lilaj, i cili ka folur për ndeshjen e radhës dhe për ecurinë që ka pasur ekipi por edhe ai në aspektin personal. Lilaj është një ndër më të mirët tek Skënderbeu dhe ka fituar disa tituj me korçarët, por nuk është i ngopur dhe dëshira për të fituar është më e madhe.
Sabjen Lilaj: ”Për mua ecuria e ekipit në këto 7 javë të para është më e rëndësishme se golat. Normalisht golat e shënuar janë shtysë për të ecur para, por fati im është që po gjuaj dhe penalltitë këtë sezon. Është shpejt për të ndjerë lodhje pasi jemi në aktivitet. Nuk jam aspak i ngopur me tituj. Kam ende dëshirë për të fituar. Luftëtari ka treguar që duhet vlerësuar maksimalisht pavarësisht se në këtë moment nuk është në pozicion të favorshëm. Objektivi ynë është fitorja. Nuk mendoj aspak për ndeshjen në Beograd, jemi të përqendruar tek ndeshja e radhës. Nuk komentoj rivalët,e rëndësishme është që duhet ti marrim ndeshjen një e nga një për të arritur objektivin titull. Mendoj se në vitet e fundit kemi qenë gjithmonë më të mirët. Nuk dëshiroj të krahasoj cili është ekipi më i mirë i këtyre viteve pavarësisht ndryshimeve të shumta. E rëndësishme është që Skënderbeu është me i forti në krahasim me rivalët e tjerë”, u shpreh Lilaj.
