Tek Vllaznia edhe pse është ndërruar kreu i pankinës problemet në ekip vazhdojnë të jenë të njëjta. Edhe këtë javë në humbjen përballë Partizanit janë vënë re gabime dhe pasiguri në mbrojtje, të cilat kanë sjellë edhe ndëshkimin me gola. Tekniku Ernert Gjoka, që zëvendësoi Armando Cungun, ka analizuar me ekipin ndeshjen që sapo lamë pas. Është vlerësuar paraqitja në fushë, por janë nxjerrë në pah edhe gabimet e shumta që sollën atë humbje. Gjoka ka dalë në përfundimin se nuk është problemi që nuk kemi lojtarë të mirë, por mentaliteti i tyre ka rënë dhe është pjesa ku duhet të punojmë më fort.
Ndryshimi i parë që bën stafi i ri në ekip është fusha stërvitore. Tashmë kuqeblutë do të stërviten në një fushë tjetër, në atë të Golemit, e cila ndodhet pak larg qytetit. Fusha sportive ku u stërvitur Vllaznia deri në këto momente, “Reshit Rusi” nuk është në standardet e duhura dhe kjo ka bërë që të ndryshohet ambienti. Por ajo që pritet nga ky staf i ri drejtuesish tek shkodranët nuk është kjo. Tifozët mbështetës të Vllaznisë dua që të shohin ekipin e tyre duke fituar dhe ti largohet fundit të tabelës. Ekipi duhet tu kthehet fitoreve sa më parë, por kjo duket e vështirë në dy ndeshjet e mbetura të fazës së parë. Këtë javë kuqeblutë do të udhëtojnë drejt Kukësit dhe marrja e një rezultati pozitiv duket shumë i vështirë. Ndërsa në javën e fundit do të përballen me kryesuesit e Skënderbeut në Shkodër, një ndeshje tjetër që shkalla e vështirësisë është mjaft e madhe.
Vllaznia gjendet në vendin e 8 në renditje, me vetëm 5 pikë në shtatë ndeshje, një ecuri shumë e dobët, por që duket se nuk do të ndryshojë në këtë fazë të parë.
