Kreu i Partisë Demokratike, Lulzim Basha ka dhënë një deklaratë për mediat menjëherë pas përfundimit të tryezës së opozitës.
Basha tha se në këtë mbledhje u ra dakord që të kërkohet largimi i Ramës nga drejtimi i qeverisë dhe krijimi i një qeverie antimafia me qëllim shembjen e lidhjes të krimit me politikën.
Po ashtu, Basha tha se çështja e dosjes “Habilaj” është vetëm maja e ajsbergut.
FJALA E BASHËS:
Falënderoj partitë politike që iu përgjigjën thirrjes time për një tryezë të përbashkët opozitare.
Kemi dalë me një vendim të përbashkët, i cili sapo iu është shpërndarë medieve
Krijimi i një fronti të bashku opozitar kundër krimit dhe ftesa qëndron e hapur për çdo parti tjetër politike dhe faktor shoqëror, në veçanti për intelektualët, përfaqësuesit e medias, sepse Shqipëria ndodhet para një gremine të vërtetë.
Si ndihet dikush që ka denoncuar 4 vite me radhë faktet e lidhjes së Ramës me krimin siç ndodhi tani, që në fakt është vetëm maja e ajsbergut?
Këtë pyetja ia bëj policisë, gazetarëve kurajozë dhe përfaqësuesve të tjerë të organizatave jo qeveritare që për 4 vite kanë bërë luftën e shembjes së kupolës mafioze të drejtuar nga Rama.
Sot shqiptarët kanë provat e pakundërshtuara të marrëdhënies krim-politikë.
Kanë provat se këto para janë përdorur për të kriminalizuar zgjedhjet. Pyetja që i shtron vetes cdo shqiptar është cfarë do bëjë më tej, a mund t’i besohet rendit, a mund të ketë cdo shqiptar besim se është kjo qeveri dhe ky kryministër që t’i besohet për reformën në drejtësi, a mund të ketë zgjedhje të lira e të ndershme? Përgjigja për çdo shqiptar është jo, kjo është koha që të marrim me shqiptarët vendim të madh për fatin e çdo shqiptari dhe fëmijëve të çdo shqiptari. Fronti i bashkuar opozitar kërkon largimin e Edi Ramës.
Kërkon krijimin një qeverie antimafia me qëllim shembjen e lidhjes të krimit me politiken
Mbi bazë të këtyre vendimeve do vendosim agjendën dhe kalendarin e veprimeve./ Tirana Today
