Kryeministri Rama deklaroi se qeveria do të ndërmarrë sa më shpejt një projekt për regjistrimin e emigrantëve shqiptarë që jetojnë kudo jashtë Shqipërisë.
Në një takim të organizuar për Diasporën dhe Migracionin, Rama falendëroi përfaqësuesit e LSI-së që ishin të pranishëm, ndërsa kritikoi mungesën e atyre demokratike, teksa edhe ftoi për bashkëpunim në këtë proces Partinë Demokratike.
FJALA E RAMËS:
Dua të falënderoj kolegun Pandeli Majko, i cili jo thjesht ka organizuar këtë tryezë kaq përfaqësuese, por që aty të gjendet një dokument i rëndësishëm që kemi synim ta çojmë para. Së shpejti do të bëjmë regjistrimin e plotë të gjithë shqiptarëve ku ata jetojnë. Dua të falënderoj përfaqësuesit e LSI dhe nuk është sekret që do dëshironim shumë që me të njëjtën gatishmëri dhe me të njëjtin sens të interesit të përbashkët që përfaqësuesit e kësaj pjesë të opozitës iu përgjigjen ftesës, të kishim këtu përfaqësuesit e opozitës kryesore, të PD. Pasi kjo është një nga ato temat që nuk kanë qasje as majtas dhe as djathtas, por edhe kombëtare.
Do të donim gatishmëri dhe bashkëpunim me partinë Demokratike. Nëse ka në Shqipëri forca që kontestojnë zgjedhjet, nuk ka një ilaç më efikas se rritje eksponenciale dhe e pjesëmarrjes për përfshirjen e shqiptarëve.
Baza e këtij procesi është regjistrimi, i cili u la pas dore për çerek shekulli. Premtimi për të regjistruar emigrantët ishte një premtim i hershëm, por hapi i parë i realizimit u hodh vetëm vitin e shkuar. Mospërfillja e autoriteteve të mëparshme është e dokumentuar.
Instituti shqiptar i Diasporës, që u krijua në Shqipëri, në 1996 u shkri në janar 2013 pa përmbushur asgjë në këtë fushë. Jemi të vendosur që vitin e ardhshëm të kryejmë regjistrimin, besojmë se do ia dalim ta realizojmë gjatë vitit të ardhshëm, të paktën në masën e saj më të madhe.
Diskutimet kanë nisur edhe me Italinë e Greqinë.
