Kryeministri Edi Rama ka prezantuar drejtorin e ri të AKU-së, Agim Ismaili. Gjatë fjalës së tij, Rama është treguar mjaft i ashpër me drejtorët e Autoritetit Kombëtar të Ushqimit, teksa ka shprehur haptazi pakënaqësinë me këtë institucion.
Kryeministri tha se AKU është një institucion gjobëvëniesh, i infektuar me korrupsion, i cili nuk e bën punën e tij siç duhet.
Rama tha se disa nga drejtorët do të testohen, ndërsa të tjerët që “e dinë vet se si kanë ardhur, të japin dorëheqjen vetë”.
Ashtu si me inspektoratet, kryeministri Rama tha se nuk do të vendoset asnjë gjobë, vetëm në rast ekstrem që ajo të jetë e mirëargumentuar, duke sqaruar se deri në ristrukturimin e këtij institucioni nuk do të ketë më gjoba nga punonjësit, të cilët, tha Rama, janë kthyer në makth për shitësit.
FJALA E RAMËS:
Kemi një situatë praktikash të papranueshme, absurde në tërësinë e tyre që e kanë bërë këtë institucion një problem kombëtar. Ky është një institucion që lidhet drejtpërdrejt me sigurinë e jetës, të shëndetit dhe standardet që Shqipëria duhet të përmbushë në raport me ambicien për të qenë pjesë e familjes evropiane. AKU është një inat që vë gjoba, që i nxin jetën sipërmarrjes, që terrorizon dyqane dhe tregtarë të vegjël dhe që në fund farë nuk përmbush misionin e vet. Historitë e AKU-së janë të pafundme dhe natyrisht që do të marrin fund njëherë e mirë. Rrugët e Shqipërisë janë të mbushura me thertore të paligjshme, këto do marrin fund. Jemi të vetëdijshëm për mangësitë të infrastrukturë, për mangësitë lidhur me punën që duhet të bëjë AKU-ja lidhur me analizat, por edhe për faktin se sot ka në kuti disa pajisje laboratorike, por s’i përdor njeri.
Edhe në AKU ka njerëz të zotë, por ajo çka këta njerëz nuk i ka lejuar të bëjnë punën e tyre është vendosja e AKU-së në thundrën e pushtetit të tepsisë.
Edhe këtu ka njerëz që duhet ta kuptojnë që duhet të largohen vetë. Besoj që drejtorët e AKU do jenë në provë, dhe një pjesë e tyre duhet të ikin vetë. E dini vet si keni ardhur dhe pse nuk mund të jenë në krye të AKU-së.
Të tjerët do vihen në provë dhe do kenë gjithë kohën për të provuar që janë njerëzit e duhur në vendin e duhur.
AKU-ja është një vatër e infektuar me korrupsion. S’do të ketë asnjë pikë gjaku në rrugë, therje në rrugë s’mund të ketë më.
Asnjë gjobë, përndryshe nëse nuk argumentohet mirë gjoba do të largohet punonjësi nga puna./Tirana Today
