Fushata elektorale në Maqedoni ka hyrë në javën e tretë të saj. Ziadin Sela ka shfrytëzuar paraqitjet televizive duke mbajtur fjalime të shumta. Ai thumboi para pak ditësh kreun e BDI-së, Ali Ahmeti edhe atë nga Kërçova.
Sela ka pasur një përplasje me Ahmetin, teksa e ka pyetur publikisht këtë të fundit përse nuk e tërheq kandidatin e BDI-së në Shkup, përderisa pretendon se dëshiron unifikim të votës shqiptare.
“Më lejoni këtu në Kërçovë, publikisht të apeloj dhe t’i jap mbështetje Fatmir Deharit që përsëri të zgjidhet kryetar komune. Por, gjithashtu do të më lejoni që publikisht ta pyes Ali Ahmetin se me çfarë porosie vjen ai në Strugë nëse unë erdha këtu në Kërçovë me mesazhin për bashkim”, tha Sela.
Kreu i BDI-së, Ali Ahmeti, ka zgjedhur pikërisht Ladorishtën e Strugës që t’u përgjigjet flakë për flakë akuzave të kreut të Aleancës për Shqiptarët, Ziadin Sela në adresë të Partisë për shkak të kandidaturës së Ramiz Merkos për postin e kryetarit të Strugës.
“Ziadinit i kam thënë: Në Strugë do matemi, do dalim në fushë të mejdanit. Dhe, këtë ia kam thënë para se të shpallen zgjedhjet!”, tha Ahmeti.
