Ekipi i Kombëtares së Italisë do të zbarkojë pasditen e sotme në Tiranë. Yjet e futbollit italian do të zbresin rreth orës 17:30 në aeroportin e Rinasit, prej nga ku do të nisen menjëherë me autobus për në Shkodër.
Në orën 20:00 është parashikuar edhe konferenca për shtyp e trajnerit Ventura dhe një prej futbollistëve të tij, në stadiumin “Loro Boriçi”, ndonëse për Italinë do të ketë vetëm një inspektim fushe dhe jo stërvitje.
Nga ana tjetër, ka pasur një interesim të jashtëzakonshëm për të ndjekur këtë ndeshje në stadiumin “Loro Boriçi”, pavarësisht çmimit pak të kripur të biletave.
Kështu, deri më tani janë shitur mbi 15 mijë bileta, ndërsa kapaciteti i stadiumit është pak më shumë se 16 mijë vende.
Çmimet e biletave për sfidën e nesërme kanë variuar nga 1.000 lekë të rinj për tribunat prapa portave të impiantit, deri në 12.000 lekë të rinj për një vend në tribunën “VIP”.
