Ministria e Infrastrukturës dhe Energjisë ka mbledhur sot komisionin e dhënies me koncesion të procedurës me objekt “Përmirësimi, ndërtimi, operimi dhe mirëmbajtja e Rrugës së Arbrit”.
Sipas shqyrtimit të sistemit elektronik, vetëm 3 operatorë ekonomikë kishin shprehur interes, konkretisht:
1-Operatori Ekonomik Adem Pojani. Por nga shqyrtimi paraprak i sistemit, rezultoi se ky operator kishte paraqitur disa dokumente, të cilat nuk rezultojnë të mjaftueshme për tu konsideruar ofertë zyrtare;
2–Operatori Ekonomik Shoqëria “Alb-Star” sh.p.k. Nga shqyrtimi paraprak i sistemit, rezultoi se ky operator kishte paraqitur disa dokumente, por nuk u konstatuan të dhënat e ofertës financiare.
3-Operatori Ekonomik Shoqëria “Gjoka Konstruksion” sh.a;
Nga shqyrtimi paraprak i sistemit, rezultoi se ky operator kishte paraqitur dokumentacionin teknik, financiar dhe ligjor si dhe kishte paraqitur Propozim Financiar.
Nga shqyrtimi paraprak i Propozimit Financiar rezultoi se Operatori Ekonomik Shoqëria “Gjoka Konstruksion” sh.a; kishte propozuar si vlerë projekti shumën prej 33,6 miliardë lekë.
Brenda 60 ditëve, komisioni do të kryejë shqyrtimin e plotë dhe të detajuar të ofertave të paraqitura dhe do të dalë me vendimmarrjen përkatëse.
