Shumë emocione do të na dhurojë edhe kjo javë në futbollin vendas dhe në atë evropian. Do të zhvillohet java e shtatë dhe lufta për të marrë vendin e parë është shumë e fortë në të gjitha kampionatet.
Premier League– Supersfida e javës do të jetë mes Chelsea-Manchester City, një ndeshje që është cilësuar si ndeshja për vendin e parë apo për titull pasi janë dy pretendentët kryesor për ta fituar atë. Me fillim në 18:30 ekipet do të zbresin në”Standford Bridg” me formacionin më të mirë për të dhuruar spektakël dhe për të treguar forcën që kanë ekipet. Conte me organikë të plotë dhe me një moral mjaftë të lartë pas fitores në Madrid përballë Atletikos kërkon të ruaj marshin e fitores. Nga ana tjetër Guardiola me një mungesë të rëndësishme si Aguero do të kërkojë të ruaj kreun dhe të garantojë që ekipi i tij është i fortë për të fituar tituj. Ndërsa Manchester United do të presë në shtëpi Crystal Palace, një sfidë e lehtë për djemtë e Mou pasi janë duke kaluar një formë mjaft të mirë. Liverpool udhëton në Neëcastle Utd për të kërkuar fitoren dhe të gjejë censin e funksionimit të sulmit. Tottenham do të përballet me Huddersfield për të marrë pikët e radhës, por futbolli anglez gjithmonë sjell surpriza. Arsenal me rotacionin e madh që bëri këtë javë në formacion pret në shtëpi Bringhton të dielën për të treguar formën e mirë të që ka gjetur.
Liga 1– PSG pas triumfit të madh në Champion League me atë fitore 3-0 përballë Bayern Munich, do të ketë përballë Bordeaux. Një kundërshtarë problematik në kampionatin francez, por që mund të kalohet pa problem nga yjet parisien. Monaco do të presë Monpellier, një formë jo e mirë për ekipin e principatës në javët e fundit e bën më të vështirë këtë përballje pasi miqtë barazuan me PSG një javë më parë duke treguar formën e mirë që po kalojnë.
Serie A– Milan-Roma supersfida e javës në kampionatin Italian zhvillohet të dielën me fillim në 18:00. Një Milan me shumë probleme dhe i paqëndrueshëm, do të ketë përballë një Romë të karikuar për fitore dhe që vjen nga një fitore në Champios League, Sfidë e fortë edhe për trajnerin Montella që rrezikon nëse mundet në këtë ndeshje. Ndërsa në 20:45 një sfidë tjetër mjaft interesante vë përballë Atalantën që po tregon një nivel futbolli të lartë dhe një shpirt luftarak me Juventusin kampion. Interi do të udhëtojë në Benevento, ndeshje delikate për zikaltërit pasi kanë treguar vështirësi me skuadrat e vogla. Napoli-Cagliari të dielën në 12:30, ku napolitanët kërkojnë fitoren për të ruajtur vendin e parë dhe të rrisin presionin ndaj Juventusit.
Bundesliga– Dortmund që kryeson i vetëm me një golavarazh fantastik, edhe këtë javë pavarësisht disfatës në Champios League me Real Madrid, në kampionat do të kërkojë të qëndrojë në vendin e parë. Përballje e vështirë pasi luan jashtë me Augsburg-un e vendit të pestë që ka treguar se di tu bëjë ballë ekipeve të mëdha. Ndeshja luhet nesër me fillim në 15:30. Të dielën e ka radhën Bayern Munich, i cili shkarkoi edhe trajnerin Anchelotti. Bavarezët do të kenë përballë Hertha Berlin-it. Në këtë sfidë do të shihet nëse vërtet ka pasur probleme mes lojtarëve dhe trajnerit të larguar dhe ata nuk kanë dhënë 100% në fushë.
Kategoria Superiore– Të hënë do të luhet supersfida e kampionatit, ku Kukësi kampion do të presë në ‘Zeqir Ymeri’ pretendentin kryesorë për titull Skënderbeun. Këta të fundit vijnë nga një superformë e javës që lamë pas, por edhe me disa mungesa për shkak dëmtimesh. Ndërsa Kukësi pritet të jetë me kontingjent lojtarësh të plotë dhe shpreson që me mbështetjen e tifozëve do të bëjë të mundur fitoren. Ndërsa Partizani ka shansin e artë për të gjetur fitoren e parë këtë sezon. Edhe pse me disa mungesa, si ajo e Edgar Canit të kuqtë presin fitoren pasi përballë do të ketë modestët e Lushnjes. /Tirana Today/
